Bakı, 6 yanvar, AZƏRTAC

Yaponiya 2025-ci ildə özünün müdafiə qabiliyyətinin artırılmasına və Birləşmiş Ştatlarla ittifaqın möhkəmlənməsinə xüsusi diqqət yetirəcək.

AZƏRTAC xəbər verir ki, Yaponiyanın Baş naziri Şiqeru İşiba bunu Yeni il münasibətilə keçirdiyi mətbuat konfransında deyib. “Ölkəmizin müdafiə qabiliyyəti heç kimin bizə qarşı müharibəyə başlamaması üçün çəkindirici qüvvədir”, - deyə Baş nazir bildirib. O, həmçinin Yaponiyanın təkcə “öz imkanlarını artırmaqla” kifayətlənməyəcəyini, həmçinin ABŞ-la ittifaqı gücləndirəcəyini və regionda tərəfdaşlıq şəbəkəsini dərinləşdirəcəyini qeyd edib.

Şiqeru İşiba seçki kampaniyası zamanı regionda “Asiya NATO-su” və kollektiv təhlükəsizlik sisteminin qurulmasının tərəfdarı olduğunu da vurğulayıb. O, “Hudson” institutu üçün yazdığı məqalədə ABŞ-ın nüvə raketlərinin Asiya regionunda yerləşdirilməsini və bu silahlara “birgə sahiblik” təklif edib. Hazırda Yaponiyanın hakim Liberal Demokrat Partiyasında “Asiya NATO-su” ideyası rəsmən müzakirə olunur və bu məqsədlə sabiq müdafiə naziri İtsunori Onoderanın sədrliyi ilə xüsusi partiya komitəsi yaradılıb.

Qeyd edək ki, Yaponiya hökumətinin 2022-ci il dekabrın 16-da təsdiqlədiyi yeni milli təhlükəsizlik strategiyasında potensial düşmənin ərazisindəki hədəflərə qarşı əks-hücumların təşkili hüququ yer alıb. Eyni zamanda, sənəddə önləyici zərbələr istisna edilib. Yeni strategiyada, həmçinin 2027-ci ilədək hərbi xərclərin təxminən iki dəfə artırılaraq ümumdaxili məhsulun iki faizinə çatdırılması nəzərdə tutulub.

Yaponiya hökuməti düşmənin dərinliklərinə əks-hücum zərbələri endirmək üçün “Type-12” raketlərinin mənzilini artırmağı, özünün hipersəs silahlarını inkişaf etdirməyi və ABŞ-dan “Tomahawk” qanadlı raketlərinin tədarükünü planlaşdırır.