Şirvan, 25 fevral, Aydın Yavərzadə, AZƏRTAC

Xocalı soyqırımının 31-ci ildönümü ilə əlaqədar Şirvan şəhər Şəhidlər xiyabanında yaradılan “Şəhid anası” memorial abidə kompleksinin qarşısında anım tədbiri keçirilib.

AZƏRTAC-ın bölgə müxbiri xəbər verir ki, Xocalı soyqırımı qurbanlarının xatirəsinə yaradılan lövhənin önünə tər qərənfillər düzülüb, faciə qurbanlarının xatirəsi dərin hüzn və ehtiramla yad edilib.

Şirvan Şəhər İcra Hakimiyyətinin başçısı İlqar Abbasov çıxış edərək, Xocalı soyqırımının təkcə Azərbaycan xalqına deyil, bütün insanlığa qarşı yönəlmiş ən ağır cinayətlərdən biri olduğunu vurğulayıb. Erməni millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin ən qanlı səhifələrindən olan Xocalı faciəsinin və onun qurbanlarının heç vaxt unudulmayacağını bildirib.

Xocalı soyqırımına ilk dəfə Ümummilli Lider Heydər Əliyevin təşəbbüsü ilə ölkə parlamenti tərəfindən siyasi-hüquqi qiymət verildiyi, 26 fevralın Xocalı soyqırımı günü elan edildiyi, təqsirkarların cəzalandırılması istiqamətində tədbirlərin həyata keçirilməsinə başlanıldığı xatırladılıb. Heydər Əliyev Fondunun vitse-prezidenti Leyla xanım Əliyevanın rəhbərliyi ilə “Xocalıya ədalət!” kampaniyasının sistemli fəaliyyətinin nəticəsi Xocalı soyqırımı haqqında həqiqətlərin dünya ictimaiyyətinə çatdırıldığı qeyd edilib. Hər il paytaxtda olduğu kimi, Şirvan şəhərində də faciə qurbanlarının xatirəsinə 613 ağac əkildiyi diqqətə çatdırılıb. 2020-ci ilin sentyabrın 27-də başlanan və 44 gün davam edən Vətən müharibəsində Müzəffər Ali Baş Komandan İlham Əliyevin çağırışı ilə ayağa qalxan igid oğullarımızın şücaəti və qəhrəmanlığı ilə 30 ildən sonra torpaqlarımızın mənfur düşmənin işğalından azad edilməsi və ərazi bütövlüyümüzün təmin olunması ilə bütün şəhidlərimiz kimi Xocalı qurbanlarının da qisasının alındığı vurğulanıb.

Sonra Şirvan şəhərində məskunlaşan Xocalı sakini Arif Əzizov Azərbaycan xalqının tarixi torpağı olan Xocalıda yaşadığı illərdən danışıb. Xocalının füsunkar gözəlliklərindən, tanınmış şəxsiyyətlərindən bəhs edib. Milli Qəhrəman Əlif Hacıyevin igidliyini və şücaətini ehtiramla xatırlayıb. Xocalı sakinlərinə göstərdikləri diqqətə və Xocalı faciəsini beynəlxalq miqyasda tanıtdıqlarına görə ölkə başçısına və Birinci vitse-prezidentə minnətdarlığını bildirib.

Sonra Vətənimizin bütövlüyü və azadlığı uğrunda canından keçən şəhidlərin məzarları ziyarət edilib, ruhlarına dualar oxunub