Siyasi şərhçi: Bakı-Brüssel münasibətləri strateji praqmatizm mərhələsinə keçir
Bakı, 8 may, AZƏRTAC
Kaya Kallasın Bakıya səfəri və ümumilikdə son aylarda Avropa İttifaqı ilə Azərbaycan arasında intensivləşən siyasi dialoq münasibətlərdə praqmatik yaxınlaşma mərhələsi kimi qiymətləndirilə bilər. Bu mərhələnin əsas xüsusiyyəti tərəflərin mövcud fikir ayrılıqlarını arxa plana keçirərək qarşılıqlı maraqlara əsaslanan əməkdaşlığı genişləndirməyə çalışmasıdır. Münasibətlər artıq yalnız enerji və ticarət sahələri ilə məhdudlaşmır, eyni zamanda, regional təhlükəsizlik və logistika bağlantıları fonunda daha sistemli xarakter almağa başlayır.
Bu fikirləri AZƏRTAC-a açıqlamasında siyasi şərhçi Rəşad Bayramov bildirib.
Onun sözlərinə görə, Azərbaycan-Avropa İttifaqı münasibətlərində mövcud dinamikanı gücləndirən əsas amillərdən biri Avropanın enerji təhlükəsizliyi ilə bağlı artan ehtiyaclarıdır. Rusiya-Ukrayna müharibəsindən sonra Avropa İttifaqı enerji təchizatının şaxələndirilməsini strateji prioritetə çevirib və bu kontekstdə Azərbaycan etibarlı alternativ mənbə kimi ön plana çıxıb. Hazırda Yaxın Şərqdə yaranmış vəziyyət isə Azərbaycana olan ehtiyacı daha da artırıb. Azərbaycan qazının Avropa bazarına ixracının genişlənməsi Bakının yalnız iqtisadi deyil, siyasi çəkisini də artırır. Bu da Azərbaycanın Brüssel qarşısında enerji tərəfdaşı statusunu daha da möhkəmləndirir və siyasi dialoqu daha balanslı edir.
R.Bayramov vurğulayıb ki, Kaya Kallas kimi ali səviyyəli Avropa rəsmilərinin regiona səfərləri Avropa İttifaqının Cənubi Qafqazda daha fəal və çoxşaxəli siyasət yürütmək niyyətindən xəbər verir.
“Burada təkcə enerji məsələləri deyil, nəqliyyat və təhlükəsizlik komponentləri də ön plana çıxır. Xüsusilə Orta Dəhliz layihəsi Avropa üçün Çin-Mərkəzi Asiya-Qafqaz-Avropa bağlantısında strateji alternativ marşrut kimi qiymətləndirilir. Azərbaycan bu dəhlizin əsas coğrafi və siyasi qovşaqlarından biri olduğuna görə Brüssel üçün vacib tərəfdaş statusunu daha da gücləndirir. Bu isə Azərbaycanın regional logistika mərkəzi kimi rolunu artırır. Bakı ilə Brüssel arasında siyasi dialoqun intensivləşməsi regionda sülh gündəliyinə də dolayı təsir göstərir. Azərbaycan ilə Avropa İttifaqı arasında artan etimad mühiti normallaşma prosesinə əlavə sabitlik elementi gətirə bilər. Ümumilikdə isə Azərbaycan-Aİ münasibətlərində formalaşan yeni mərhələ geosiyasi balans baxımından da mühüm əhəmiyyət daşıyır. Azərbaycan bütün aktorlarla strateji əməkdaşlığı genişləndirərək çoxvektorlu xarici siyasət modelini daha da gücləndirir. Avropa İttifaqı isə Cənubi Qafqazda həm enerji, həm də nəqliyyat bağlantıları baxımından daha dayanıqlı mövqe qazanmağa çalışır”, - deyə R.Bayramov bildirib.
O hesab edir ki, qarşılıqlı maraqlar yaxın illərdə Azərbaycan-Avropa İttifaqı münasibətlərini strateji praqmatizm mərhələsinə yüksəldə bilər.
“Bütün bunlar onu göstərir ki, Bakı-Brüssel münasibətləri artıq, sadəcə, əməkdaşlıq deyil, qarşılıqlı strateji ehtiyaclara əsaslanan daha dərin bir mərhələyə keçir. Bu mərhələ enerji təhlükəsizliyi, Orta Dəhlizin inkişafı və regionda sülhün dayanıqlılığı baxımından ciddi təsir potensialına malikdir”, - deyə siyasi şərhçi əlavə edib.
Müxbir - Səbinə Əlizadə
Bölmənin digər xəbərləri
