Stokholmda qeyri-qanuni yerləşdirilən muflonlar qoyunçuluq üçün risklər törədir
Stokholm, 30 oktyabr, Nərgiz Cəfərli, AZƏRTAC
Stokholmun bir neçə dairəsində muflonların qeyri-qanuni yerləşdirilməsinə dair şübhələr yaranıb. Stokholm dairəsinin inzibati şurasının şübhəsinə səbəb muflonların daha əvvəl tapılmadıqları və onların qaça biləcəkləri volyerlərin olmadığı yerlərdə görünmələri olub.
AZƏRTAC xəbər verir ki, bu növə əsasən Stokholm arxipelaqının müxtəlif adalarında, eləcə də Stokholmdan cənuba və şimala doğru yerləşən ərazilərdə rast gəlinir.
“Muflonlar məskunlaşdıqları yerlərə çox bağlıdır və həmin yerlərdən böyük məsafəyə uzaqlaşmırlar. Onların müxtəlif adaları üzüb keçmələri və ya böyük məsafə qət etmələri barədə ehtimal çox azdır”, - deyə Stokholm dairəsi inzibati şurasının vəhşi təbiət üzrə mütəxəssisi Yannike Rinq bildirib.
Muflonların vəhşi təbiətə buraxılması ilə bağlı risklərdən biri ev heyvanları olan qoyunlarla cütləşmələridir. Bu isə, öz növbəsində, qoyunçuluqla məşğul olan şəxslər üçün maliyyə fəsadları törədə bilər. Ən böyük təhlükə ondadır ki, muflonlar qoyunlar arasında ölümcül visna-maedi virusunu yaya bilərlər.
Dairənin inzibati şurasının məlumatına görə, vəhşi təbiətdə muflon görən hər kəs polisə müraciət etməlidir. Ovçu lisenziyası olanlara isə bu növ heyvanları ovlamaq tövsiyə olunur.
Bundan əvvəl qeyri-qanuni yerləşdirilməsi ehtimal edilən muflonları Uppsala dairəsinin bəzi yerlərində görmüşdülər. O vaxt da inzibati şura ovçuları həmin heyvanları ovlamağa çağırmışdı.
Bölmənin digər xəbərləri
