Sudanda silahlı münaqişə başlayandan bəri 400-dən çox dinc sakin həlak olub
Bakı, 29 aprel, AZƏRTAC
Sudanda ordu ilə xüsusi təyinatlı qüvvələr arasında silahlı münaqişə başlayandan bəri 400-dən çox dinc sakin həlak olub, 2 mindən çox insan isə yaralanıb.
AZƏRTAC Al Arabiya telekanalına istinadla xəbər verir ki, bu məlumat Sudan həkimlərinin həmkarlar ittifaqının bəyanatında yer alıb.
“Ölkədə hərbi əməliyyatlar başlayandan bəri 411 dinc sakin həlak olub, 2 min 23 nəfər xəsarət alıb”, - deyə məlumatda bildirilir.
Bəyanatda, həmçinin qeyd olunur ki, silahlı toqquşmaların getdiyi rayonlarda yerləşən 86 xəstəxanadan 61-i fəaliyyətini tam dayandırıb. Bundan başqa, 15 tibb müəssisəsi bombardmana məruz qalıb, 19 xəstəxananın personalı isə tam heyətdə təxliyə edilib.
Xatırladaq ki, aprelin 15-də Merove və Xartum şəhərlərində xüsusi təyinatlı qüvvələrlə Sudan ordusu arasında toqquşmalar başlayıb. BMT yaxın günlərdə 270 min insanın qonşu ölkələrə, əsasən də Çad və ya Cənubi Sudana sığınacağını proqnozlaşdırır.
Bölmənin digər xəbərləri
