SUMQAYITDA 20 YANVAR HADİSƏLƏRİNƏ HƏSR OLUNMUŞ ƏDƏBİ-BƏDİİ KOMPOZİSİYA NÜMAYİŞ ETDİRİLMİŞDİR
Salona toplaşanlar 20 Yanvar şəhidlərinin xatirəsini bir dəqiqəlik sükutla yad etmişlər.
1990-cı il yanvarında baş vermiş qanlı hadisələr Hüseyn Ərəblinski adına Sumqayıt Dövlət Musiqili Dram Teatrı aktyorlarının ifasında ardıcıllıqla xatırlanmışdır. Kompozisiyada müstəqilliyimizin müdafiəsinə qalxmış insanların mərdliyi, o günlərin hüzn dolu ab-havası, habelə sovet ordusunun silahsız adamlara qarşı amansızlığı əks etdirilmişdir.
Teatrın baş rejissoru Firudin Məhərrəmovun hazırladığı və aktyorların bacarıqla təqdim etdikləri ədəbi-bədii kompozisiya vətənpərvərlik, inam və qələbə ruhu ilə aşılanmışdı.
Şəhərin bütün ümumtəhsil məktəblərində, tibb müəssisələrində və əmək kollektivlərində 20 Yanvar faciəsinin 16-cı ildönümü ilə əlaqədar tədbirlər keçirilmiş, qiraət müsabiqələri, rəsm sərgiləri təşkil olunmuşdur.
Sumqayıtın Tarixi Muzeyində faciənin ildönümünə həsr olunmuş ekspozisiya açılmışdır. Burada nümayiş etdirilən “İmperiyanın qisası” kitabının ideya müəllifi, sumqayıtlı Akif Quluyev jurnalistlərlə birlikdə 20 Yanvar hadisələrini əhatə edən sənədli materialları xronoloji ardıcıllıqla oxuculara təqdim etmişdir.
