SUMQAYITDA İDMAN İLİNƏ YEKUN VURULMUŞDUR
AZƏRTAC-ın müxbiri xəbər verir ki, şəhər icra hakimiyyətində dünya və Avropa çempionatları qaliblərinin şərəfinə təşkil olunmuş qəbulda çıxış edən Sumqayıt İdman və Gənclər İdarəsinin rəisi Musa Həsənov bildirmişdir ki, ötən mövsümdə idmanın 26 növü üzrə 245 müxtəlif tədbir keçirilmişdir. Yarışlarda 14 min idmançı iştirak etmişdir. M.Həsənovun sözlərinə görə, şəhərin 10 minə yaxın sakini bədən tərbiyəsi və idmanla fəal məşgul olur, burada 4 idman cəmiyyəti, bir o qədər uşaq idman məktəbi, 17 klub fəaliyyət göstərir. Məşğələləri 190 yüksəkixtisaslı məşqçi aparır ki, onların da 30-u respublikanın əməkdar məşqçisidir.
Ötən il Sumqayıt idmançıları dünya və Avropa çempionatlarından 41 medalla, o cümlədən 17 qızıl medalla qayıtmışlar.
Görüşdə çıxış edən məşqçilər və idmançılar bütövlükdə idmanın inkişafına, eləcə də hər bir idmançıya göstərdiyi diqqət və qayğıya görə Azərbaycan Prezidenti və Milli Olimpiya Komitəsinin rəhbəri İlham Əliyevə minnətdarlıqlarını bildirmişlər.
Bölmənin digər xəbərləri
