Sumqayıtda konfrans: “Müasir Azərbaycanın memarı və qurucusu”
Sumqayıt, 9 mart, AZƏRTAC
Sumqayıtda “Heydər Əliyev İli” çərçivəsində şəhər icra hakimiyyəti və “Azərbaycan” qəzetinin birgə təşkilatçılığı ilə “Müasir Azərbaycanın memarı və qurucusu” mövzusunda konfrans keçirilib.
AZƏRTAC xəbər verir ki, konfrans iştirakçıları əvvəlcə Ümummilli Lider Heydər Əliyevin büstü önünə gül dəstələri düzüb, əziz xatirəsinə ehtiramlarını bildiriblər.
Ulu Öndər Heydər Əliyevin 100 illik yubileyinə həsr olunmuş konfransda şəhidlərimizin və dahi rəhbərin xatirəsi bir dəqiqəlik sükutla yad edilib.
Sumqayıt Şəhər İcra Hakimiyyətinin başçısı Zakir Fərəcov çıxış edərək bildirib ki, müasir Azərbaycanın tarixinin 34 ildən artıq bir dövrü Ulu Öndər Heydər Əliyevin adı ilə bağlıdır. Heydər Əliyevin Azərbaycana həm birinci, həm də ikinci rəhbərliyi mərhələsi tariximizə yüksəliş və quruculuq dövrü kimi daxil olub. Respublikamızın hansı şəhərinə, hansı rayonuna baş çəksək, Ulu Öndərin dövlət və xalq qarşısındakı müstəsna xidmətlərinə şahidlik edərik.
Bu gün nəinki Azərbaycanın, bütün Qafqazın sənaye mərkəzi kimi tarixi şöhrətini bərpa edən Sumqayıtın da yüksəlişində Ümummilli Lider Heydər Əliyevin böyük xidmətləri var. Hazırda öz intibahının yeni mərhələsini yaşayan Sumqayıtın sovet hakimiyyəti dövründə inkişafı və nəinki keçmiş SSRİ-də, bütün dünyada tanınması Heydər Əliyevin sayəsində mümkün olub. Sumqayıtın 74 illik tarixinin hər bir mərhələsini təhlil etsək görərik ki, sovet illərində məhz Heydər Əliyevin respublikamıza rəhbərlik etdiyi dövrdə Sumqayıtın möhtəşəm tarixi yazılıb.
“Azərbaycan” qəzetinin baş redaktoru, Milli Məclisin deputatı Bəxtiyar Sadıqov Heydər Əliyevin Azərbaycanın bütün sahələrdə inkişafı və tərəqqisi naminə gördüyü işlərdən danışıb, Ulu Öndərin hər gün anıldığını, xatırlandığını diqqətə çatdırıb. Vurğulayıb ki, Ulu Öndər Heydər Əliyev hansı vəzifədə olmasından asılı olmayaraq, həmişə ölkəsi, xalqı, Azərbaycanın gələcəyi üçün zəruri addımlar atıb. Bütün varlığı ilə Vətəninə, torpağına, xalqına sədaqətli olub. Həyatı boyu çalışdığı bütün sahələrdə və vəzifələrdə Vətəninin bu gününü və gələcəyini düşünüb, konkret əməli işlər görüb.
Konfrans Sumqayıt Şəhər Ağsaqqallar Şurasının sədri Təbrik Quliyev, “Şöhrət” ordenli Əməkdar müəllim Ofelya Babayeva, “ASAN xidmət” Mərkəzinin Baş mütəxəssisi, gənc fəal Fəridə Qafarova və digərlərinin çıxışları ilə davam edib.
Bölmənin digər xəbərləri
