Şuşa şəhərinin dirçəldilməsinin Qarabağın sosial-iqtisadi inkişafında strateji əhəmiyyəti böyükdür - Açıqlama
Bakı, 12 may, AZƏRTAC
Böyük Qarabağ Zəfərindən sonra işğaldan azad olunmuş ərazilərin inkişaf etdirilməsində, konseptual yanaşmaların formalaşmasında və dövlət siyasətinin təkmilləşdirilməsində Şuşa şəhərinin dirçəldilməsi impulsları həlledici rol oynayıb.
Ölkə Prezidentinin Sərəncamı ilə 2022-ci il “Şuşa İli” elan olunmuş və Şuşa şəhərinin 270 illiyi ilə əlaqədar olaraq silsilə tədbirlər keçirilmiş, dünyanın hər yerindən Şuşaya məşhur insanlar, turistlər, siyasi xadimlər, görkəmli şəxslər, ilk növbədə qardaş respublika və dövlətlərdən, başda Türkiyə olmaqla türkdilli ölkələrdən çoxlu sayda qonaqlar Şuşa şəhərinin qədim abidələri, görkəmli yerlərini ziyarət etmiş və burada həyata keçirilən dirçəliş prosesləri ilə yerindəcə tanış olmuşdular.
Bu barədə AZƏRTAC-a açıqlamasında UNEC Qarabağ İqtisadi Araşdırmalar Mərkəzinin rəhbəri, professor Şəfa Əliyev deyib.
Bildirib ki, hazırda Şuşa əslində böyük bir tikinti meydançasını xatırladır, burda yüzlərlə abidənin, görkəmli yerlərin, mədəniyyət və digər baxımdan xüsusi əhəmiyyət kəsb edən binaların bərpası və yenidən qurulması prosesləri gedir. Şuşada infrastruktur yaradılır, sosial infrastruktur şəbəkəsi formalaşdırılır. Şəhərdə həm də turizm-rekreasiya imkanlarını özündə ehtiva edən iri sanatoriyanın təməli qoyulub. Digər tərəfdən Şuşada sosial sahələrin formalaşdırılması, sosial-iqtisadi inkişaf impulslarının təmin edilməsi üçün müvafiq şəraitin yaradılması, kommunal xidmət sahələrinin inkişaf etdirilməsi və xidmət sektorunun genişləndirilməsi istiqamətində önəmli addımlar atılmaqdadır. Təbii ki, şəhər ilk növbədə sabit elektrik enerjisi və içməli su ilə təmin olunub.
Yeni infrastruktur obyektlərinin tikintisi və yaxın perspektivdə Şuşada geniş xidmət sektorunun və şəbəkəsinin yaradılması proseslərinin daha da sürətlənməsi gözlənilir.
Şuşada ilboyu müxtəlif festivalların və musiqi tədbirlərinin, yəni yaradıcılıq sənayesi tədbirlərinin keçirilməsi, layihələrin reallaşdırılması nəzərdə tutulur. Eyni zamanda, Şuşa ilə bağlı tədbirlər əsasında şəhərin milli ornamentləri, arxitektura ənənələri, milli dəyərlər və şəhərin özünəməxsus inkişaf xüsusiyyətləri və memarlıq üslubları nəzərə alınmaqla, burada yaşayış massivinin salınması prosesləri sürətləndirilməkdədir.
Şuşa həm də davamlı inkişafın təmin edilməsində, Azərbaycan xalqının qədim adət və ənənələrinin yaşanmasında və bunun dünyaya çatdırılmasında önəmli funksiyaları yerinə yetirən bir mədəniyyət beşiyi və mərkəzi kimi yaxın perspektivdə çox mühüm funksiyaları yerinə yetirəcək. Burada beynəlxalq əhəmiyyət kəsb edən tədbirlərin reallaşdırılması, elmi-praktik, iqtisadi və digər sahələrə aid tədbirlərin keçirilməsi, xüsusilə xidmət və mədəniyyət sektoru sahələrinin inkişaf etdirilməsi ilə bağlı mövcud potensialı dəyərləndirilərək beynəlxalq səviyyəyə çıxarılması, investorların bu sahəyə cəlb edilməsi, dünya səviyyəsində formalaşmış təcrübədən daha geniş istifadə etməklə, Şuşa şəhərinin sosial-iqtisadi inkişafının sürətləndirilməsinə imkan verən layihələrin həyata keçirilməsi ölkəmizdə davamlı inkişafın sürətləndirilməsinə əlavə imkanlar verəcək.
Şuşa şəhərinin dirçəldilməsi həm də hər bir azərbaycanlı və Türk dünyası tərəfindən böyük qürurla qarşılanan sosial-iqtisadi inkişaf impulsu kimi də qəbul olunur. Şuşa həm də Türk dünyasının fəxri, gözü, bəbəyidir və 2023-cü ildə Şuşanın Türk dünyasının mədəniyyət mərkəzi kimi elan edilməsi, bu istiqamətdə daha genişmiqyaslı tədbirlərin görülməsinə və layihələrin həyata keçirilməsinə əlavə imkanlar formalaşdırıb. Yəni bütün ilboyu türkdilli dövlətlərin iştirakı ilə adət-ənənələrin geniş təbliği, milli dəyərlərimizin aşılanması və dəyərləndirilməsi, burada mövcud resurslardan daha da bəhrələnərək müxtəlif istiqamətlərdə regional və beynəlxalq əməkdaşlığın genişləndirilməsi imkanları diqqət çəkir. Digər tərəfdən, Şuşa şəhəri həm də ölkəmizin dayanıqlı və davamlı inkişafında önəmli rol oynaya biləcək amillər baxımından böyük əhəmiyyət kəsb edir.
Şuşa şəhərinin dirçəldilməsi və sürətli inkişafı, ümumilikdə regionun inkişafına müsbət təsir göstərəcək. Şuşanın inkişafı onun ətrafındakı kənd və qəsəbələrin bərpasını sürətləndirəcək, həmin kəndlərin, qəsəbələrin sosial-iqtisadi inkişafına əlavə stimullar verəcək. Reallaşdırılan layihələr hesabına həmin kənd və qəsəbələrin əhalisinin reinteqrasiyası, həm kənd təsərrüfatı məhsullarının yetişdirilməsi və emal olunması infrastrukturunun yaradılması, kiçik və orta biznes subyektlərinin formalaşdırılması perspektivləri genişlənəcək.
Həmçinin Şuşa şəhərində milli brendlərin formalaşdırılması, suvenirlərin hazırlanması, tekstil məhsullarının istehsal edilməsi imkanları artacaq.
Yaxın perspektivdə Şuşa şəhərinin sosial-iqtisadi inkişafının dirçəldilməsində önəmli hadisələrin baş verəcəyini qeyd edə bilərik:
- Şuşada iqtisadiyyat quruculuğu daha intensiv təmin olunacaq və əsas etibarı ilə xidmət sektoru sahələri prioritetlik təşkil edəcək,
- Şuşada turizm-rekreasiya imkanlarının reallaşdırılması istiqamətində daha çox işlərin görülməsi qənaətindəyik, hazırda təməli dövlət başçısı tərəfindən qoyulmuş Şuşa turizm-
rekreasiya kompleksinin - “Şuşa” sanatoriyasının tikintisi aparılır,
- Şuşada yaşayış massivlərinin salınması işləri sürətlə gedir və tezliklə Şuşaya Böyük Qayıdış reallaşacaq.
Bu qeyd edilən tədbirlərin həyata keçirilməsi nəticəsində Şuşa şəhərinin həm də bu il 100 illiyi qeyd ediləcək. Ulu Öndər Heydər Əliyevin görmək istədiyi və vaxtı ilə əsasını qoyduğu dinamik inkişaf edən və Qarabağın mərkəzi funksiyasını yerinə yetirən Şuşa şəhərinin formalaşması və inkişaf etməsi mümkün olacaq.
Bölmənin digər xəbərləri
