Şuşada keçirilən Zəfər Qurultayı Azərbaycan tarixinə qızıl hərflərlə yazılacaq
Bakı, 25 aprel, AZƏRTAC
Azərbaycanın tarixi şəhəri, türk dünyasının mədəni paytaxtı Şuşa şəhərində Dünya Azərbaycanlılarının V Qurultayı keçirildi. Bu, Azərbaycan tarixinə qızıl hərflərlə yazılacaq qədər əlamətdar hadisədir.
Bunu AZƏRTAC-a açıqlamasında Ana Vətən Partiyasının sədr müavini Yalçın Hacızadə söyləyib.
Onun sözlərinə görə, Azərbaycanın diaspor fəaliyyəti qısa müddətdə uzun və əlamətdar yol keçib. Ümummilli lider Heydər Əliyev 1993-cü ildə hakimiyyətə yenidən gəldikdən sonra bu istiqamətdə vahid və birləşdirici siyasət yürütmüşdü. Onun hakimiyyətə gəlişinə qədər ölkədə etnik əsaslı siyasətin aparılması nəinki xaricdə yaşayan azərbaycanlıların birləşməsinə, ölkənin parçalanmasına aparırdı. Ölkədəki mövcud hakimiyyətin səriştəsiz siyasəti nəticəsində xarici qüvvələrin təsiri ilə separatçılıq kifayət qədər yüksəlmiş, müxtəlif adlarla qondarma qurumlar meydana çıxmışdı. Belə bir təhlükədən ölkəmizi ulu öndər Heydər Əliyevin hakimiyyətə yenidən qayıdışı ilə başlayan, respublikada və ondan kənarda yaşayan bütün etnik millətləri birləşdirən azərbaycançılıq siyasəti qurtara bildi.
Partiya sədrinin müavini bildirib ki, ulu öndər Heydər Əliyevin rəhbərliyi ilə Dünya Azərbaycanlıların I Qurultayı 2001-ci ilin noyabr ayında Bakıda keçirilib. Ümummilli Lider Qurultayın keçirilməsinin əhəmiyyəti, dünya azərbaycanlılarının birləşməsinin vacibliyi, ölkənin müstəqillik əldə etdikdən sonra keçdiyi yol, Ermənistan-Azərbaycan müharibəsi və qarşıda görüləcək işlər barədə geniş nitq söyləmişdi. Həmçinin Qurultay zamanı qətnamə və bütün dünya azərbaycanlılarına müraciət qəbul edilmişdi.
“Dünya Azərbaycanlılarının II Qurultayı Prezident İlham Əliyevin Sərəncamına əsasən 2006-cı ildə, III Qurultayı 2011-ci ildə, IV Qurultay isə 2016-cı ildə keçirilib. Aparılan diaspor siyasətinin və belə tədbirlərin nəticəsində bu sahədə təşkilatlanma işləri daha da genişlənib, dünyanın bir çox ölkələrində və şəhərlərində diaspor təşkilatları və evləri yaradılıb. Azərbaycanlıların yaşadıqları ölkələrdə ictimai-siyasi, mədəni həyatda iştirakı artıb və bu istiqamətdə geniş əlaqələrin qurulması təşviq edilib. Keçirilən qurultaylarda Azərbaycan Prezidenti İlham Əliyev dünya azərbaycanlılarına öz tövsiyələrini bildirərək qeyd edib: “İlk növbədə əlbəttə, biz istəyirik ki, dünyada yaşayan azərbaycanlılar öz tarixi Vətənləri ilə əlaqələri heç vaxt kəsməsinlər. Daim əlaqədə olsunlar, Azərbaycan ilə bağlı olsunlar. Beləliklə, onlar özlərini daha da rahat hiss edəcəklər. Belə olan halda Azərbaycan dövləti onlara daha da böyük dəstək verə biləcək... Mən çox istəyirəm ki, onlar yaşadıqları ölkələrdə daha da böyük mövqelərə nail ola bilsinlər. Yaşadıqları ölkələrin ictimai, siyasi, iqtisadi həyatında daha da fəal rol oynasınlar. Yetişən gənc nəsil də Azərbaycan ilə bağlı olmalıdır. İlk növbədə, Azərbaycan dilini bilməlidirlər.... Əlbəttə, mən çox istəyirəm ki, xaricdə fəaliyyət göstərən diaspor təşkilatları da bir nöqtəyə vursunlar, birləşsinlər. Belə olan halda onların gücü də, ictimaiyyət tərəfindən onlara qarşı hörmət də artacaq... Biz hamımız istəyirik ki, Azərbaycan daha da güclənsin. Hamımız istəyirik ki, xaricdəki azərbaycanlılar rahat yaşasınlar, yaşadıqları ölkələrdə yüksək mövqelərə malik olsunlar və Azərbaycanı ləyaqətlə təmsil etsinlər”. Əlbəttə, bütün bunlar qurultaylarda qəbul edilmiş sənədlərdə öz əksini tapıb və qurultay iştirakçılarının fəaliyyəti üçün proqram xarakterli normalar olub”, - deyə Yalçın Hacızadə diqqətə çatdırıb.
O qeyd edib ki, Vətən müharibəsi zamanı böyük Qələbə əldə olunub. Bu Qələbənin yaranmasında dünya azərbaycanlılarının da əhəmiyyətli rolu var. Həmin vaxt qəlbində vətən sevdası olan hər bir azərbaycanlı yaşadığı ölkədə Azərbaycanın təbliği ilə məşğul idi. Onlara fiziki, mənəvi təzyiqlər göstərilirdi. Bütün bunlara baxmayaraq, onlar Azərbaycanın səsini yaşadıqları ölkələrdə qaldırırdılar və Qələbəmizin təbliği üçün əllərindən gələni etdilər. Ona görə onların da Şuşanı görməyə haqları var.
Türk dünyasının və Azərbaycanın mədəniyyət mərkəzi olan Şuşada keçirilən qurultay Zəfər Qurultayıdır. Bundan əvvəl keçirilən bütün qurultaylarda növbəti qurultayın Şuşada keçirilməsi arzu edilib.
“Şuşanı öz gözləri ilə görmək üçün buraya gələn diaspor nümayəndələrimiz Şuşadan qayıtdıqdan sonra, ilk növbədə, hamının ürəyinin döyündüyü o müqəddəs torpağın ecazkar, füsunkar təbiətini, gedən abadlıq işlərini yaşadıqları ölkələrdə təbliğ edəcəklər. Qısa müddət ərzində güclü Azərbaycan dövlətinin bu işin öhdəsindən necə gəldiyini əfsanə kimi danışacaqlar. Onlar qısa zaman kəsiyində Zəfər yolunun çəkildiyinin, Füzuli Beynəlxalq Hava Limanının inşasının, energetika sisteminin qurulduğunun, yeni evlərin tikildiyinin, mədəniyyət ocaqlarının, qədim tarixi abidələrimizin bərpa olunduğunun şahidi olublar”, - deyən Yalçın Hacızadə fikirlərini yekunlaşdırıb.
Bölmənin digər xəbərləri
