“Taliban” Əfqanıstanın Qor əyalətinin rayonlarından birinə nəzarəti ələ keçirib
Bakı, 12 iyun, AZƏRTAC
“Taliban” hərəkatının silahlıları Əfqanıstanın hökumət qüvvələri ilə toqquşmalardan sonra Qor əyalətinin Tulak rayonu üzərində nəzarəti ələ keçirib.
AZƏRTAC TOLOnews telekanalına istinadla xəbər verir ki, taliblərin hücumu iyunun 11-də axşam saatlarında başlayıb.
Tulak rayonunun qubernatoru ağır döyüşlər nəticəsində təhlükəsizlik qüvvələrinin azı 20 əməkdaşının həlak olduğunu, bir o qədər hərbçinin yaralandığını, 10 əsgərin isə “Taliban” döyüşçülərinə əsir düşdüyünü bildirib. Lakin qubernator rayonun nəzarətinin taliblərin əlinə keçdiyi barədə məlumatları təsdiqləməyib.
Qeyd edək ki, Əfqanıstanda hökumət qüvvələri ilə kənd yerlərində əhəmiyyətli əraziləri ələ keçirən və böyük şəhərlər uğrunda döyüşlər aparan “Taliban” hərəkatı arasında qarşıdurma davam edir. 2020-ci il sentyabrın 12-də Qətərin paytaxtı Dohada Əfqanıstan hökuməti ilə “Taliban”ın təmsilçiləri arasında sülh danışıqları başlayıb.
Bölmənin digər xəbərləri
