Tallinn Universiteti ilə AMEA-nın İnformasiya Texnologiyaları İnstitutu arasında əməkdaşlıq müqaviləsi imzalanmışdır
Bakı, 31 oktyabr (AZƏRTAC). Azərbaycan Milli Elmlər Akademiyasının (AMEA) Rəyasət Heyətində Estoniyanın Tallinn Universitetinin İnformasiya Tədqiqatları İnstitutu bölməsinin professoru Sirje Virkus və dosent Aira Lepik ilə görüş keçirilmişdir.
Akademiyadan AZƏRTAC-a bildirmişlər ki, görüşdə AMEA-nın akademik-katibi, İnformasiya Texnologiyaları İnstitutunun (İTİ) direktoru, akademiyanın müxbir üzvü Rasim Əliquliyev Azərbaycanda informasiya cəmiyyəti quruculuğu istiqamətində görülən məqsədyönlü işlərdən və dövlət siyasətinin əsas istiqamətlərindən söhbət açmışdır. Alim İTİ-nin əsas fəaliyyət istiqamətlərinin informasiya texnologiyaları və informasiya cəmiyyətinin müxtəlif problemlərinin araşdırılması olduğunu bildirmişdir.
S.Virkus təmsil etdiyi elmi qurumun fəaliyyəti haqqında məlumat verərək İnformasiya Tədqiqatları İnstitutunda informasiya və kommunikasiya elmi sahəsində bakalavr, magistr və doktorantura proqramlarının həyata keçirildiyini söyləmişdir. Qurumun informasiya və bilik idarəçiliyi, rəqəmsal kitabxanalar və elmi təşkilatlarda informasiyanın idarəolunması kimi istiqamətlərindən söz açmışdır.
Sonra Tallinn Universitetinin İnformasiya Tədqiqatları İnstitutu ilə AMEA İTİ arasında elm, təhsil və tədqiqat sahəsində əməkdaşlığa dair müqavilə imzalanmışdır.
Sənəddə müvafiq sahədə birgə konfrans və seminarların təşkili, innovativ layihələrin həyata keçirilməsi, kadr və təcrübə mübadiləsi kimi məsələlər əksini tapmışdır.
Görüşdə, həmçinin AMEA ilə Estoniyanın müxtəlif elmi qurumları arasında əməkdaşlıq əlaqələrinin qurulması və inkişaf perspektivlərinə dair fikir mübadiləsi aparılmışdır.
Bölmənin digər xəbərləri
