HEYDƏR ƏLİYEV - 100
Tanınmış rusiyalı siyasətçilər və ictimai xadimlər Heydər Əliyev haqqında
Moskva, 16 may, AZƏRTAC
Bu günlərdə Moskvada Azərbaycan xalqının Ümummilli Lideri Heydər Əliyevin 100 illiyi ilə əlaqədar tədbirlər keçirilir. Rusiyanın tanınmış şəxsləri, siyasi və ictimai xadimlər Ulu Öndər haqqında xatirələrini AZƏRTAC-ın müxbiri ilə bölüşüb, Azərbaycan və Rusiya Federasiyası tarixində Heydər Əliyevin rolundan danışıblar.
Federasiya Şurasının beynəlxalq məsələlər Komitəsinin sədri Qriqori Karasin:
-Heydər Əliyev bir çox hadisələrin gedişatını əvvəlcədən müəyyən edir, qabaqlayıcı tədbirlər görür və heç vaxt təslim olmurdu. O, Azərbaycana rəhbərlik etdi, onu ölkənin hazırkı vəziyyətinə gətirdi.
Rusiya Federasiyası Xarici İşlər Nazirliyinin rəsmi nümayəndəsi Mariya Zaxarova:
-Bizi Azərbaycan ilə çox şey bağlayır, bu, humanitar əlaqələrin yüksək səviyyəsi, ümumi tarixdir. Bütün bunlar Heydər Əliyevin adı ilə bağlıdır. Onun həyat yolunu, onun peşəkar nailiyyətlərini Azərbaycanın, eləcə də Rusiyanın taleyindən ayırmaq mümkün deyil. Bu günlərdə Heydər Əliyev şəxsiyyətinin miqyasından çox danışılıb. Mən öz şəxsi düşüncələrimdən danışacağam. Heydər Əliyevin böyüklüyü ondadır ki, onun işini davam etdirən və artıra bilən belə oğul tərbiyə etməyi bacarıb. Çox insanlar var ki, tarix yaradıb. Lakin öz oğlunda bu tarixi zənginləşdirmək bacarığı hər kəsə nəsib olmur. Fikrimcə, bu, onun əsl böyüklüyünün əsas göstəricisidir. Mən Azərbaycan xalqını təbrik edir, ölkəyə tərəqqi arzulayıram.
Rusiyanın Xarici Kəşfiyyat Xidmətinin direktoru Sergey Narışkin:
-Heydər Əliyev Sovet İttifaqının və müstəqil Azərbaycanın həyatında böyük rol oynayıb. Rusiyada Heydər Əlirza oğlunun - ölkələrimiz arasında dostluğun, əməkdaşlığın, mehriban qonşuluğun inkişafı üçün çox iş görmüş insanın xatirəsi böyük hörmətlə anılır. Biz onun vəsiyyətləri ilə yaşayacağıq.
“Nezavisimaya qazeta”nın baş redaktoru Konstantin Remçukov:
-Heydər Əliyev yüksək kateqoriyalı siyasətçidir. Bütün bunlarla yanaşı, o, bir keyfiyyətə sahib idi ki, şəxsən mən bunu zəkanın mühüm təzahürünə aid edirəm. Zəka mənim üçün erudisiya, təhsil, məlumatlılıq deyil, öz əməllərinin nəticələrini əvvəlcədən görmək bacarığıdır. Heydər Əliyev özündən sonra bizə əməllərinin nəticələrini əvvəlcədən görmək kimi zəka gücünə sahib olan oğul qoyub gedib. Bu, Azərbaycanı və onun liderlərini ayrıca yerə ayırmaq imkanı verir: onları başqa respublikalardan heç kimlə müqayisə etmək mümkün deyil. Bu, unikal, çox ağıllı, müdrikliyə yüksələn mövqedir. Azərbaycan hamının yaşadığı mürəkkəb şəraitdə ləyaqətini, hörmətini qoruyub saxladı və dünyada öz yerini tapdı.
Rusiya Federasiyası Prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy:
-Heydər Əliyev Azərbaycan mədəniyyətinin inkişafı üçün çox iş görüb. Heydər Əlirza oğlunun Azərbaycan rəhbərliyinə qayıtması hamı üçün prinsipcə mühüm idi. Güclü liderin gəlişi Azərbaycanın özü üçün çox vacib idi. Hamı gözəl başa düşürdü ki, məhz Heydər Əliyev kimi şəxsiyyət barışmazları barışdırmağı bacarar. Rusiyada həmişə Heydər Əlirza oğlunun şəxsiyyətinə yeni postsovet məkanının quruculuğu üçün vacib sima kimi baxırdılar. Vladimir Putinin Heydər Əliyevə münasibəti xüsusi idi. Onlar ilk dəfə görüşəndə açıq görünürdü ki, bu insanlar dünyada baş verən geosiyasi vəziyyəti anlayırlar. Heydər Əlirza oğlunun adı bizim üçün təkcə postsovet məkanının mühüm liderlərindən birinin adı deyil. O, dünya səviyyəli lider olduğunu sübut etdi. Bunu regionda və region hüdudlarından kənarda hamı hiss edirdi.
Moskva Dövlət Beynəlxalq Münasibətlər İnstitutunun (MDBMİ) rektoru Anatoli Torkunov:
-Mən Heydər Əlirza oğlunu SSRİ rəhbərliyində işlədiyi dövrdə çox yaxşı xatırlayıram. Məsələ orasındadır ki, o vaxt o, MDBMİ-də mənə çox kömək edib. Heydər Əliyev bilirdi ki, bizdə əcnəbilərin sayı artır, - təxminən bütün təhsil alanların dörddəbiri, - lakin professor-müəllim heyəti, təqaüdlər çatışmırdı. O, o vaxt hökumət səviyyəsində bizə bütün bu problemlərin həllində böyük kömək göstərdi. Biz həmişə onun haqqında minnətdarlıqla danışırıq. Məni çox sevindirir ki, Rusiyada çoxlu sayda məktəblər, institutlar öz təşəbbüsləri ilə Heydər Əliyevin 100 illiyini qeyd edirlər. Bu, Heydər Əliyevin təkcə Azərbaycanda deyil, həm də Rusiyada qoyduğu xatirədən xəbər verir. Biz Fəxri doktorumuzun xatirəsini əziz tutur və daim qəlbimizdə yaşadacağıq.
AZƏRTAC-ın xüsusi müxbiri
Moskva