Tarixə möhür vurmuş Zəfər gəncliyi ŞƏRH
Bakı, 2 fevral, AZƏRTAC
Tarixin bütün çağlarında xalqın inkişafı, dövlətin tərəqqisi çox vaxt gəncliyin çiyinlərində olub. Gənclik özündə yeniliyi və gələcəyə istiqaməti yaşatdığından bütün cəmiyyətlərdə bu amil ümid yeri sayılıb.
Bizi fərəhləndirən, qürurumuz olan gənclərimiz Qarabağ savaşında erməni beyin mərkəzlərinin bütün proqnozlarını darmadağın edərək onlara böyük məyusluq yaşatdı. İşğalçı ölkənin təhlilçiləri yeni nəsil Azərbaycan gənclərinin Qarabağı unutduqlarını düşünür, müharibə başlasa belə onların döyüş ruhunda, qabiliyyətində olmadıqlarını hesab edirdilər. Həqiqət, müharibə meydanı isə bunun tam əksini göstərdi. 44 günlük müharibədə Azərbaycan gənclərinin qəhrəmanlığı, Vətən, dövlət sevgisi qarşı tərəfə şok yaşatdı. Ermənistanın təhlilçiləri yalnız bir şeyi etiraf etməli oldular - Vətəni Azərbaycan gəncliyi kimi sevmək lazımdır!
İllər ərzində gənclərimizlə bağlı aparılan düzgün siyasət, vətənpərvərlik təbliğatı tariximizin qəhrəmanlıq səhifəsinin yazılması ilə nəticələndi. Bu gənclik qalib əsgər adı ilə Müzəffər Ali Baş Komandanın inamını, etibarını doğrultdu və Zəfər Gəncliyi kimi tarixə möhür vurdu.
Bu fikirləri AZƏRTAC-a açıqlamasında Milli Məclisin deputatı, tibb elmləri doktoru Rəşad Mahmudov bildirib.
O vurğulayıb ki, dövlətçiliyin təməl prinsiplərini mükəmməl bilən, onu hər zaman reallıqda tətbiq edən xalqımızın Ümummilli Lideri Heydər Əliyev bütün fəaliyyəti dövründə gənclərə xüsusi önəm verir, onlara qayğı ilə yanaşırdı.
R.Mahmudovun sözlərinə görə, hələ sovet dönəmində Azərbaycan gənclərinin müasir elmi nailiyyətlərə yiyələnməsi, bacarıqlı mütəxəssis kimi yetişməsi üçün bütün imkanları səfərbər edən Ulu Öndərin bu istiqamətdə fəaliyyətinin müsbət nəticələrini müstəqillik illərində əyani olaraq yaşadıq. Xüsusilə, hərbi, elmi sahədə və hüquq-mühafizə orqanlarında Azərbaycan gənclərinin peşəkar kadr kimi yetişməsinə böyük dövlət adamının 1970-ci illərdə göstərdiyi diqqət 1990-cı illərdə müstəqil Azərbaycan dövlətinin qurulmasında öz əhəmiyyətini göstərdi. Ölkənin ağır günlərində xalqın təkidli tələbi ilə hakimiyyətə gələrək milləti və dövləti yox olmaq təhlükəsindən xilas edən Ulu Öndər ənənəsinə sadiq qalaraq gənclər siyasətinə xüsusi önəm verdi. Müstəqil Azərbaycan gəncliyi qarşısında yeni hədəflər qoyan Ümummilli Lider Heydər Əliyev, eyni zamanda, bütün istiqamətlərdə gəncliyə dəstək oldu. Ölkənin gənclik siyasətinin sistemli aparılması üçün Gənclər Nazirliyinin yaradılması, gənclər forumunun keçirilməsi və Gənclər Gününün təsis edilməsi kimi fundamental işlər bu diqqət və qayğının əyani sübutuna çevrildi. Ulu Öndər dövlət idarəçiliyinin bütün sahələrində gəncləri önə çəkməklə bu sahədəki siyasəti real əsaslarla möhkəmləndirdi, ölkə gəncliyinə geniş meydan verdi. Sonrakı illərdə də böyük dövlət adamının gənclərlə bağlı siyasət kursu davam etdirilərək yeni çağırışlara uyğun inkişaf mərhələsinə qədəm qoydu.
“Azərbaycanda elm, dövlət idarəçiliyi, idman və digər sahələrdə gənclərimizin ortaya qoyduğu uğurlar məhz bu siyasətin real nəticəsi sayıla bilər. Beləliklə, gözləntilər səmərəsini verdi. Dövlətimizin qayğısı ilə əhatələnmiş gənclərimizin səsi dünyanın ən nüfuzlu elm ocaqlarında, idman saraylarında, konfrans salonlarında eşidildi, bayrağımız yüksəkliklərdə göründü, Azərbaycanın haqlı mövqeyi beynəlxalq miqyasda səsləndi, Vətənə bağlılıq kimi unikal dəyərlər gənclərimizin simasında nümayiş olundu. Bütün bunlarla yanaşı, Azərbaycan gəncliyinin bütün tarix boyu göstərdiyi ən böyük nailiyyət heç şübhəsiz Zəfər savaşıdır”, - deyə R.Mahmudov qeyd edib.
Deputat bildirib ki, Vətən müharibəsində gənclərimiz heyrətamiz qəhrəmanlıq, inanılmaz döyüş bacarığı və yüksək vətənpərvərliyi ilə bütün dünyanı heyran qoydu, hamı bizə, gənclərimizə oxşamaq istədi, hamı gənclərimizdən danışdı. Çünki gənclərimiz qüdrətini nümayiş etdirməklə dövlətimizin etimadını doğrultdu və sübut etdi ki, Vətəni sevmək, onun uğrunda can vermək şərəfdir.
“Hərb meydanında qəhrəmanlıq dastanı yaradan Azərbaycan gəncliyi bu gün dövlət quruculuğunda, ölkəmizin tərəqqi və inkişafında da ön sıradadır. Qalib ölkənin qalib gəncliyi qalib Liderin rəhbərliyi ilə Azərbaycanın inkişafında səmərəli fəaliyyət göstərir və ölkəmizin uğurlarında onların payı əvəzsizdir”, - deyə Rəşad Mahmudov vurğulayıb.
Bölmənin digər xəbərləri
