TARİXİ ŞƏHƏRLƏRİN İNKİŞAF PROBLEMLƏRİ İLƏ BAĞLI III BEYNƏLXALQ SİMPOZİUM KEÇİRİLMİŞDİR

04.10.2005 [16:54]
Çap et
A⁺ A^-

AZƏRTAC xəbər verir ki, Azərbaycan Memarlıq və İnşaat Universitetində Təhsil, Mədəniyyət, Gənclər, İdman və Turizm nazirliklərinin, Bakı Şəhər İcra Hakimiyyətinin dəstəyi ilə “Şərqi və Mərkəzi Asiyanın tarixi şəhərlərinin planlaşdırma və inkişaf problemlərinə həsr edilmiş III beynəlxalq simpozium” keçirilmişdir. Tədbirdə Yaponiya, Çin, Koreya, Özbəkistan və digər ölkələrin tanınmış universitetlərinin nümayəndələri iştirak etmişlər.

Əvvəlcə, tədbir iştirakçıları Fəxri xiyabana gələrək, xalqımızın ümummilli lideri Heydər Əliyevin xatirəsini ehtiramla anmış, məzarı önünə gül düzmüşlər.

Şəhidlər xiyabanında uyuyan qəhrəman Vətən övladlarının da xatirəsi yad edilmişdir.

Universitetin rektoru, Milli Məclisin deputatı, professor Gülçöhrə Məmmədova çıxış edərək, tarixi memarlıq abidələrinin qorunmasının vacibliyindən danışmış, simpoziumun əhəmiyyətini nəzərə çarpdırmışdır.

Təhsil nazirinin müavini İradə Hüseynova, mədəniyyət nazirinin müavini, AMEA-nın müxbir üzvü Sevda Məmmədəliyeva dünya şöhrətli siyasi xadim Heydər Əliyevin elm və təhsilimizin, mədəniyyət və incəsənətimizin inkişafına daim böyük önəm verdiyini vurğulamış, ulu öndərimizin ideyalarının Azərbaycan Prezidenti İlham Əliyev tərəfindən çox uğurla həyata keçirildiyini bildirmiş, tədbir iştirakçılarını təbrik etmiş, onlara uğurlar arzulamışlar.

Yaponiyanın Keyyo Universitetinin professoru Riichi Mıyake ölkəsi ilə Azərbaycan arasındakı dostluq əlaqələrindən bəhs etmişdir.

Sonra məruzələr dinlənilmişdir.

Tədbir iştirakçıları ölkəmizin memarlıq abidələri ilə də tanış olacaqlar.