QAN YADDAŞI
TBİLİSİDƏ 20 YANVAR ŞƏHİDLƏRİNİN XATİRƏSİNƏ HƏSR OLUNMUŞ TƏDBİR KEÇİRİLMİŞDİR
Tbilisi, 19 yanvar (AZƏRTAC). Yanvarın 19-da Tbilisi şəhərində 20 Yanvar şəhidlərinin xatirəsinə həsr olunmuş tədbir ümummilli liderimiz Heydər Əliyevin Tbilisi şəhərindəki büstü önünə əklil qoyulması ilə başlanmışdır.
Azərbaycanın Gürcüstandakı səfiri Namiq Əliyev, Kvemo Kartli-Borçalı bölgəsinin qubernatoru David Kirkitadze, bu ölkədəki azərbaycanlıların nümayəndələri ulu öndərin abidəsini ziyarət etdikdən sonra mərasim Tbilisidəki “Varlıq” mədəniyyət mərkəzində davam etdirilmişdir.
İştirakçılar 20 Yanvar faciəsinə dair kitabları və foto sərgini nəzərdən keçirmişlər. Sonra Azərbaycan Respublikası Xarici İşlər Nazirliyinin təşəbbüsü ilə hazırlanmış “Azadlığa gedən yollar” filmi nümayiş etdirilmişdir.
Səfir Namiq Əliyev 20 Yanvar faciəsi barədə ətraflı məlumat vermiş, xain ermənilərin hiyləgərliyi və fitvası ilə Bakı şəhərinə yeridilmiş sovet ordu hissələrinin müstəqillik və azadlıq uğrunda dinc nümayişə çıxmış əhaliyə qarşı ağlasığmaz vəhşiliklər törədərək, günahsız insanların qanına qəltan etdiyini demişdir. Sonradan bu haqsızlıqların və vəhşiliyin üstünü ört-basdır etmək məqsədi ilə müxtəlif bəhanələrlə dünyanın diqqətini hakimiyyət çevrilişinə cəhd, İslam fundamentalizminin güclənməsi kimi bəhanələrə əl atan imperiya Azərbaycan xalqının haqq səsini boğa bilmədi. Ulu öndər Heydər Əliyevin cəsarəti sayəsində xalqımızın haqq səsi dünya ictimaiyyətinə çatdırıldı.
N.Əliyev bildirmişdir ki, faciədən 20 il keçir, bu yaralar heç vaxt unudulmayacaqdır. Azərbaycanın bu günki uğurları, bölgədə liderliyi, dünya siyasi səhnəsində layiqli yer tutub müstəqilliyini və azadlığını daha da möhkəmləndirməsi şəhidlərin ruhuna hörmətin ən bariz nümunəsidir.
Səfir vurğulamışdır ki, Prezident İlham Əliyevin yeritdiyi siyasət nəticəsində Azərbaycan diplomatiyasının uğurları artır və tezliklə ərazi bütövlüyümüzün bərpasına ümid güclənir.
Cürcüstan parlamentinin deputatı Ramin Bayramov, “Varlıq” mədəniyyət mərkəzinin rəhbəri Rafiq Hümmət, “Gürcüstan” qəzetinin redaktoru Süleyman Süleymanov, jurnalist Emin Mahmudov və başqaları uğurlu gələcək naminə keçmişin acı dərslərindən ciddi nəticələr çıxarılmasını, 20 Yanvar faciəsini törədənlərin layiqli cəzalarını almaları üçün lazımi tədbirlər görülməsini arzulamışlar.
Sonda Rustavi şəhərindəki 18 nömrəli məktəbin Azərbaycan şöbəsinin şagirdləri 20 Yanvara həsr olunmuş kompozisiya göstərmişlər.
İslam Əliyev
AZƏRTAC-ın xüsusi müxbiri
Tbilisi