TƏBİİ FƏLAKƏT ŞƏKİ KƏNDLƏRİNƏ CİDDİ ZİYAN VURMUŞDUR
Rayon Fövqəladə hallar komissiyasından AZƏRTAC-ın müxbirinə bildirmişlər ki, güclü yağış nəticəsində Şin çayı məcrasından çıxmış, ətrafdakı kəndlərə sel düşmüşdür. Sel suları rayonun Köndələn və Baş Göynük kəndlərinə xüsusilə ciddi ziyan vurmuş, böyük dağıntılara səbəb olmuşdur. Həmin ərazidə, habelə Aşağı Şabalıd, İnçə, Baş Layısqı, Qoxmuq, Qumux, Şin, Baltalı, Cumakənd, Qaradağlı, Bolludərə, Oxud kəndlərində və digər yaşayış məntəqələrində güclü külək ağacları sındırmış, evlərin dam örtükləri dağılmış, hasarlar aşmış, həyətlərə və evlərə sel düşmüş, kəndarası yollar və su xətləri sıradan çıxmış, yazlıq əkin sahələrinə ciddi ziyan dəymişdir. Güclü külək nəticəsində həmin ərazidəki bütün kəndlərdə elektrik təchizat sistemi tamamilə yararsız hala düşmüşdür. Hazırda həmin kəndlərə elektrik enerjisinin verilməsi dayandırılmışdır.
Şəki Şəhər İcra Hakimiyyətinin başçısı Əşrəf Məmmədovun iştirakı ilə kəndlərdə operativ müşavirələr keçirilmiş, təbii fəlakətin nəticələrinin aradan qaldırılması üçün konkret tədbirlərin görülməsinə başlanmışdır. Azərbaycan Beynəlxalq Bankı tərəfindən fəlakət zonasına bir ədəd “S” markalı traktor göndərilmişdir. “Bayva” şirkəti elektrik enerjisi təchizatının təmin edilməsi üçün zəruri tədbirlər görür. Respublika Fövqəladə Hallar üzrə Komissiyanın nümayəndələri hazırda rayona dəymiş zərərin həcmini müəyyənləşdirirlər.
