Tehranda Böyük Vətən müharibəsində qələbənin 73-cü ildönümü qeyd olunub
Tehran 9 may AZƏRTAC
Mayın 9-da İranda akkreditə olunan MDB dövlətlərinin səfirlərinin iştirakı ilə 1941-1945-ci illər Böyük Vətən müharibəsində Qələbənin 73-cü ildönümü münasibətilə tədbir keçirilib.
AZƏRTAC xəbər verir ki, əvvəlcə tədbir iştirakçıları Rusiya səfirliyinin ərazisində Böyük Vətən müharibəsində həlak olanların xatirəsinə ucaldılmış abidə önünə əklil qoyublar.
Tədbirdə səfirlər təmsil etdikləri dövlətlərin faşizm üzərində qələbəyə verdikləri töhfədən danışıblar.
Azərbaycanın İrandakı səfiri Bünyad Hüseynov bildirib ki, ikinci dünya müharibəsi illərində Azərbaycan xalqı həm ön cəbhədə, həm də arxa cəbhədə böyük qəhrəmanlıq və igidlik göstərib.
Qeyd olunub ki, ümummilli lider Heydər Əliyev Azərbaycana rəhbərlik etdiyi illərdə daim Böyük Vətən müharibəsi veteranlarına diqqət və qayğı ilə yanaşıb, onların sosial vəziyyətinin yaxşılaşdırılması üçün bir sıra sərəncamlar imzalayıb. Hər il 9 - May Qələbə Günü münasibətilə Prezident İlham Əliyev iki dəfə Sovet İttifaqı Qəhrəmanı Həzi Aslanovun abidəsi önündə müharibə veteranları ilə görüşür. Azərbaycanda veteranlara böyük hörmətlə yanaşılır.
Səfir nəzərə çatdırıb ki, 1942-ci ildə yaradılmış Azərbaycanlılardan ibarət 416-cı Taqanroq diviziyası Qafqaz uğrunda gedən döyüşlərdə xüsusi şücaət göstərib. Sonradan Taqanroq diviziyası Cənub Cəbhəsinin tərkibinə daxil edilərək döyüş yolunu Berlinə qədər davam etdirib.
Diplomat qeyd edib ki, müharibə başladıqdan qısa müddət sonra yüz minlərlə azərbaycanlı cəbhəyə yollanıb. 130-a yaxın həmyerlimiz Sovet İttifaqı Qəhrəmanı adına layiq görülüb. İki dəfə Sovet İttifaqı Qəhrəmanı Həzi Aslanov və digər Sovet İttifaqı qəhrəmanları və bir çox başqaları öz qəhrəmanlıqları ilə xalqımızın şərəfli tarixinə yeni sətirlər yazıblar.
Azərbaycan xalqı arxa cəbhədə də şücaət göstərərək qələbənin əldə edilməsində xüsusi rol oynayıb. İkinci Dünya müharibəsi Azərbaycandan uzaqda başlansa da, neftlə zəngin olan Bakını zəbt etmək faşizmin əsas məqsədlərindən idi. Azərbaycanda hasil olunan neft bütün Sovet İttifaqında hasil olunan neftin 71,4 faizini təşkil edirdi. Belə yüksək hasilat SSRİ-nin İkinci Dünya müharibəsindəki qələbəsini təmin etmiş, xalq təsərrüfatının qarşısında duran bir çox məsələlərin həllinə nail olunmuşdu. Qətiyyətlə demək olar ki, Bakı nefti faşizm üzərində qələbə qazanılmasında başlıca amillərdən biri idi.
Sonda tədbir mədəni proqramla davam edib.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
