“TƏHSİL HAQQINDA” QANUN PARLAMENTİN MÜZAKİRƏSİNƏ ÇIXARILDI
AZƏRTAC xəbər verir ki, Milli Məclisin Elm və təhsil məsələləri daimi komissiyasının fevralın 8-də keçirilən iclasında “Təhsil haqqında” qanun layihəsi müzakirə olunmuşdur.
Komissiyanın sədri Şahlar Əsgərov bildirdi ki, birinci oxunuşdan sonra layihəyə 27 düzəliş edilmiş, qanun təkmilləşdirilmişdir.
Layihədə deyilir ki, bu çərçivə qanunudur, təhsil sistemi ilə bağlı ümumi müddəaları müəyyənləşdirir, onun ayrı-ayrı pillələri üçün müvafiq qanunların və digər qanunvericilik aktlarının qəbul edilməsində baza rolunu oynayır.
Qanunda ümumi təhsil sisteminin 9+2 prinsipi əsasında təşkil olunması nəzərdə tutulur və qeyd edilir ki, ümumi orta təhsil məcburi, tam orta təhsil isə könüllüdür. Ali peşə-ixtisas təhsili bakalavr və magistr pilləlidir. Mülkiyyət və hüquqi-təşkilati formasından asılı olmayaraq təhsil müəssisələrində oxumaq istəyənlərin bilik səviyyəsi müvafiq icra hakimiyyəti orqanı tərəfindən müəyyən olunmuş Vahid Milli Test üsulu ilə qiymətləndiriləcəkdir. Dövlət təhsil müəssisələrinin rəhbərləri kollektiv tərəfindən seçiləcək və müvafiq icra orqanı tərəfindən təsdiq ediləcəklər. Beynəlxalq olimpiadalarda 1, 2 və 3-cü yerləri qazanmış, habelə, orta məktəbi qızıl və gümüş medalla bitirmiş şagirdlərə güzəştlər nəzərdə tutulur.
Milli Məclis sədrinin birinci müavini Arif Rəhimzadə, təhsil naziri Misir Mərdanov, Tələbə Qəbulu üzrə Dövlət komissiyasının sədri Məleykə Abbaszadənin, deputatlar, dəvət olunmuş digər elm adamlarının rəy və təklifləri nəzərə alınmaqla layihəni ikinci oxunuşda parlamentin müzakirəsinə çıxarmaq qərara alındı.
Bölmənin digər xəbərləri
