TƏHSİL NAZİRLİYİNDƏ MÜƏLLİM GÜNÜ İLƏ BAĞLI TƏNTƏNƏLİ MƏRASİM KEÇİRİLMİŞDİR
Tədbir iştirakçıları, öncə Fəxri xiyabana gələrək, xalqımızın ümummilli lideri, müstəqil Azərbaycan dövlətinin banisi və qurucusu, dünya şöhrətli siyasi xadim Heydər Əliyevin xatirəsini dərin ehtiramla anmış, məzarı önünə gül düzmüşlər.
Təhsil naziri Misir Mərdanov çıxış edərək, ölkəmizin Prezidenti İlham Əliyevin “Azərbaycan Respublikasının təhsil işçilərinin təltif edilməsi haqqında” və “Azərbaycan Respublikasının təhsil işçilərinə “Əməkdar müəllim” fəxri adının verilməsi haqqında” 2005-ci il 4 oktyabr tarixli sərəncamlarının əhəmiyyətini vurğulamışdır.
Nazir bildirmişdir ki, dövlətimizin başçısının imzaladığı sənədlərə əsasən, 2 müəllim “Şöhrət” ordeni, 113 müəllim “Tərəqqi” medalı ilə təltif olunmuş, 104 təhsil işçisinə isə “Əməkdar müəllim” Fəxri adı verilmişdir.
M. Mərdanov yüksək təltifə və fəxri ada layiq görülən müəllimləri və bütün təhsil işçilərini əlamətdar gün münasibətilə təbrik etmiş, onlara uğurlar arzulamışdır.
Sonra mükafatlar təqdim edilmişdir.
Azərbaycan Milli Elmlər Akademiyasının müxbir üzvü Vaqif Abbasov və çıxış edən müəllimlər təhsilimizə və təhsil işçilərinə göstərilən diqqət və qayğıya görə dövlətimizin başçısına dərin minnətdarlıqlarını bildirmiş, yeni nəslin təlim-tərbiyəsi üçün bundan sonra da var qüvvələrini sərf edəcəklərinə söz vermişlər.
