Tibb bacısı: Hər bir yaralının gözlərini açması, həyata dönməsi bizim üçün xoşbəxtlik idi
Bakı, 12 may, AZƏRTAC
Tibb bacısı peşəsi çox məsuliyyətli və dəyərli bir peşədir. Şəfqət bacıları öz şəfalı əlləri ilə xəstələrin yaralarına, ağrılarına məlhəm olmağa çalışır, tezliklə sağlamlıqlarına qovuşmaları üçün gecə-gündüz çalışırlar. Ən çətin anlarda tibb bacılarının peşəkarlığı, vəziyyəti düzgün dəyərləndirməsi xəstənin səhhətində müsbət dəyişikliklərə səbəb ola, hətta onun həyatını qurtara bilər.
Bunu AZƏRTAC-a müsahibəsində Nərimanov Tibb Mərkəzinin allerqologiya şöbəsinin tibb bacısı Elnarə Rzayeva deyib.
Vətən müharibəsi zamanı yaralılara xidmət etmək üçün könüllü olaraq müraciət etdiyini deyən E.Rzayeva həmin dövrün onun üçün ağır sınaq olduğunu diqqətə çatdırıb: “Vətən müharibəsi dövründə Yevlax Rayon Mərkəzi Xəstəxanasında fəaliyyət göstərmişəm. O hissləri yaşamaq, yaralı əsgər və zabitlərimizə qulluq etmək, onların sağalmağında pay sahibi olmaq bizim üçün çox qürurvericidir. Hərbi qulluqçularımızın əzizləri, doğmaları onlardan çox uzaq idi. Yeri gəlsə onlara ana, yeri gəlsə bacı olurduq. Yaraları sızıldayanda bizim də ürəyimiz yanırdı. Xəstəxanaya gətirilən ağır yaralıların sağalması üçün göz yaşları içində dua edir, aclıq, yorğunluq, yuxusuzluq demədən başları üstündən çəkilmirdik. Hər bir yaralının gözlərini açması, həyata dönməsi bizim üçün xoşbəxtlik idi. Şəhid olan döyüşçülərimizi anaları, bacıları əvəzinə yana-yana ağlayırdıq. O günlər həm ağır, həm də qürurlu idi. Yaralılarımızla o qədər doğmalaşdıq ki, onlar hələ də bizimlə əlaqə saxlayır, hər zənglərində dəfələrlə minnətdarlıq bildirirlər. Qəhrəmanlarımızın, Qalib Ordunun döyüşçülərinin dilindən xoş sözlər eşitmək bizim üçün böyük fəxarətdir.
Bu gün Beynəlxalq Tibb Bacısı Günüdür, bizim bayramımızdır. Öz peşəsinin öhdəsindən layiqincə gələn bütün həmkarlarımı təbrik edir, fəaliyyətində uğurlar arzulayıram. Hər zaman xalqımıza xidmət etməyə hazırıq”.
Bölmənin digər xəbərləri
