TİBB UNİVERSİTETİNİN TƏLƏBƏSİ, PREZİDENT TƏQAÜDÇÜSÜ NÜMUNƏ ƏLİYEVANIN ÇIXIŞI
-Hörmətli cənab Prezident!
Hörmətli mərasim iştirakçıları!
Sizi universitetimizin tələbələri adından salamlayır və ən xoş
arzularımı çatdırıram.
Unudulmaz rəhbərimiz Heydər Əliyev həm 1970-1980-ci illərdə, həm də müstəqillik dövründə Azərbaycan xalqının və dövlətinin inkişafı, potensialının möhkəmlənməsi üçün çox böyük işlər görmüşdür.
Əsası görkəmli alim, ictimai xadim, universitetimizin ilk rektorlarından biri olan professor Əziz Əliyev tərəfindən qoyulmuş bu tələbə şəhərciyinin daha da genişləndirilməsi və inkişaf etdirilməsi, universitetimizin maddi-texniki bazasının daha da möhkəmləndirilməsi ulu öndər Heydər Əliyevin adı ilə bağlıdır. Bu tələbə şəhərciyindəki tədris binalarının əksəriyyəti - fizika-kimya korpusu, əzəmətli 11 mərtəbəli tədris binası, çoxsaylı tələbə yataqxanaları məhz Heydər Əliyevin rəhbərliyi, köməyi ilə tikilib ərsəyə gəlmişdir. Biz çox şadıq ki, Heydər Əliyev dövrünün ənənələri bu gün də davam etdirilir.
Hörmətli cənab Prezident, Sizin insan amilinə verdiyiniz yüksək qiymət, təhsilə, elmə, səhiyyəyə, xüsusən gənclərə göstərdiyiniz xüsusi diqqət bunun bariz nümunəsidir. Bu gün bizim üçün tarixi bir gündür. Universitetimizin tədris-terapevtik klinikasının təməlqoyma mərasimidir.
Hörmətli cənab Prezident, universitetimizdə tələbələrin yüksək səviyyədə təhsil ala bilməsi üçün əlverişli şərait yaradılmışdır. Tələbələrimizin beynəlxalq konfranslarda və müsabiqələrdə uğurla çıxış edərək, yüksək nəticələrə nail olması bunu bir daha sübut edir. Lakin Azərbaycan Tibb Universitetinin kliniki kafedralarının əksəriyyətinin Bakı şəhərinin müxtəlif rayonlarında yerləşməsi tədris prosesinin təşkilində çətinliklər yaradır.
Hörmətli cənab Prezident, inanırıq ki, “Azərbaycan Tibb Universitetinin tədris-terapevtik klinikasının yaradılması haqqında” Sizin 2007-ci il 11 sentyabr tarixli Sərəncamınız yaxın zamanlarda universitetimizin dünyanın aparıcı universitetləri cərgəsinə qoşulmasına və respublikamızda səhiyyənin inkişafına səbəb olacaqdır.
Bugünkü mərasimdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyeva da iştirak edir. Mehriban xanım, Sizin rəhbərliyinizlə Heydər Əliyev Fondunun ayrı-ayrı bölgələrdə məktəblərin inşasına, yeni səhiyyə ocaqlarının yaradılmasına yaxından kömək göstərməsi respublikamızda elmin, təhsilin, səhiyyənin inkişafına göstərilən xüsusi diqqət və qayğının bariz nümunəsidir. Buna görə sizə dərin təşəkkürümüzü bildiririk.
Mən 2005-ci ildə yüksək bal toplayaraq Azərbaycan Tibb Universitetinə qəbul olunmuşam. Hörmətli cənab Prezident, mənim üçün çox xoşdur ki, Sizin imzaladığınız Sərəncamla Prezident təqaüdünə layiq görülmüşəm. Prezident təqaüdçüsü adı mənim üçün həm şərəf, həm də böyük məsuliyyətdir. Mən dövlətimizin bizim üçün yaratdığı bu imkanlardan bəhrələnib gələcəkdə savadlı mütəxəssis olmaq və xalqımızın xidmətində durmaq istəyindəyəm. Sevinirəm ki, mənim kimi minlərlə tələbə təməli bu gün qoyulan bu gözəl klinikada gənc həkim kimi formalaşmaq imkanı əldə edəcəkdir. Ona görə də universitetimizin tələbələri və gənc həkimləri adından Sizə dərin təşəkkürümü bildirirəm. Sizə söz veririk ki, gələcəkdə yüksək səviyyəli, peşəkar, vətənpərvər, xalqına xidmət edən həkim və vətəndaş olacağıq.
Diqqətinizə görə təşəkkür edirəm.
X X X
Sonra Prezident İlham Əliyev mərasimdə nitq söylədi.
X X X
Mərasim başa çatandan sonra Azərbaycan Prezidenti və xanımı universitetin tədris korpusu ilə tanış oldular.
Prezident İlham Əliyev və xanımı Mehriban Əliyeva xalqımızın ümummilli lideri Heydər Əliyevin tədris korpusunun foyesindəki büstünə, buradakı fotostendlərə baxdılar.
Stendlərdəki fotoşəkillər 1998-ci ildə Prezident Heydər Əliyevin iştirakı ilə universitetin nəzəri fənlər tədris edilən 5-ci korpusunun açılışından bəhs edir. Ayrıca bir bölmə görkəmli oftalmoloq alim, akademik Zərifə xanım Əliyevaya həsr olunmuşdur.
Dövlətimizin başçısı universitetin 500 yerlik akt salonu ilə tanış oldu. Burada həmin tədris müəssisəsinin tədbirlərindən əlavə, müxtəlif beynəlxalq tibbi konqreslər də keçirilir. Azərbaycan Prezidenti və xanımı immunologiya kafedrasına baş çəkdilər, tibbi biologiya fakültəsinin tələbələrinin dərs prosesinin gedişi ilə maraqlandılar. Dövlətimizin başçısına tədris prosesində immunoloji və biokimyəvi analizlər aparılması üçün istifadə edilən müasir avadanlıq barədə məlumat verildi.
Prezident İlham Əliyev universitetin tibbi informasiya mərkəzində də oldu. Bu mərkəzin Moskvadakı mərkəzi tibbi kitabxana, Türkiyənin Hacəttəpə Universiteti ilə əməkdaşlıq əlaqələri var, mərkəz digər ölkələrin təcrübəsini öyrənir, eyni zamanda, xaricdəki həmkarlarını Tibb Universitetinin həyatındakı yeniliklərlə tanış edir. Burada tələbələrin bilik səviyyələrini yüksəltməsi, onların internet vasitəsilə tibbi ədəbiyyat yenilikləri ilə tanış olması üçün hər cür şərait yaradılmışdır.
Prezident İlham Əliyev universitetin professor-müəllim heyəti ilə görüşdü. Onlar ölkəmizdə səhiyyəyə və tibb elminin inkişafına göstərdiyi diqqət və qayğıya, habelə yaradılan iş şəraitinə görə dövlətimizin başçısına təşəkkür etdilər.
Bölmənin digər xəbərləri
