Tokayev: Qazaxıstan Türk Dövlətləri Təşkilatında daimi nümayəndəlik açmağı planlaşdırır
Astana, 22 may, AZƏRTAC
Qazaxıstan yaxın vaxtlarda Türk Dövlətləri Təşkilatı (TDT) yanında daimi nümayəndəlik açmağı planlaşdırır.
AZƏRTAC Qazaxıstan Prezidentinin mətbuat xidmətinə istinadla xəbər verir ki, bu barədə ölkə Prezidenti Kasım-Jomart Tokayev Budapeştdə Türk Dövlətləri Təşkilatına üzv ölkələrin dövlət başçılarının qeyri-rəsmi iclasında bəyan edib.
Onun sözlərinə görə, artıq Qazaxıstanın Türk Dövlətləri Təşkilatı yanında daimi nümayəndəsi təyin olunub.
“11-12 iyun tarixlərində Astanada Türk Dövlətləri Parlament Assambleyasının (TÜRKPA) XIV plenar iclası keçiriləcək. Aktau şəhəri bu il türk dünyasının mədəniyyət paytaxtı elan olunub. Bu şərəfli missiya çərçivəsində konkret tədbirlərin icrasına başlanılıb. Qazaxıstanın təşəbbüsü ilə ötən həftə seçki orqanlarının məşvərətçi platforması yaradılıb. Onun ilk iclası qədim Türküstanda uğurla keçirilib. Tərəflərin razılığı ilə cari ilin iyun ayından etibarən Almatı şəhəri TDT-nin gənclər paytaxtı olacaq”, – deyə Prezident bildirib.
Tokayev qeyd edib ki, Qazaxıstan türk birliyinin möhkəmləndirilməsi naminə fəal şəkildə çalışır.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
