“Tottenhem”in sabiq futbolçusu: “Qarabağ” Londonda qələbə qazana bilər
Bakı, 23 sentyabr, AZƏRTAC
“Bizi İngiltərədə çox maraqlı oyun gözləyir”.
Bu sözləri AZƏRTAC-a açıqlamasında İngiltərənin “Tottenhem” komandasının sabiq futbolçusu, vaxtilə Azərbaycanda “Şamaxı” və “Turan Tovuz” komandalarında çıxış etmiş Natan Oduva deyib.
Keçmiş komandasının UEFA Avropa Liqasının əsas mərhələsinin ilk turunda “Qarabağ”a qarşı keçirəcəyi oyundan danışan 29 yaşlı yarımmüdafiəçi şansları dəyərləndirib.
O, London və Ağdam təmsilçilərinin kifayət qədər keyfiyyətli oyunçulara sahib olduğunu bildirib: “Bu mənada şansları bərabər qiymətləndirirəm. Tərəflərdən hər biri bu görüşdə qələbə qazana bilər. Bu komandalar 2015-ci ildə də üz-üzə gəlmişdilər. Fikrimcə, azarkeşlər üçün maraqlı oyun olacaq”.
İngiltərəli forvard hər iki komandanın hücum futbolu oynadığını vurğulayıb: “Bu da oyuna əlavə rəng qatacaq. Həm “Tottenhem”, həm də “Qarabağ” meydanda bu cür mübarizəni sevir”.
Qeyd edək ki, sentyabrın 26-da Londondakı “Tottenhem Hotspur” stadionunda oynanılacaq görüş Bakı vaxtı ilə saat 23:00-da start götürəcək.
Bölmənin digər xəbərləri
