Türkiyə Jurnalistlər Federasiyasının prezidenti Humanitar Forumun əhəmiyyətindən yazır
İstanbul, 9 oktyabr (AZƏRTAC). Dördüncü Bakı Beynəlxalq Humanitar Forumunun iştirakçılarından biri də Türkiyə Jurnalistlər Federasiyasının prezidenti Atilla Sertеl olub. Forumda iştirakı ilə bağlı təəssüratlarını yerli KİV-lərdə bölüşən A.Sertеl bu mötəbər tədbirin yüksək peşəkarlıqla təşkil olunmasını, nüfuzlu ictimai-siyasi xadimlərin, görkəmli elm və mədəniyyət simalarının, aparıcı media təmsilçilərinin mərasimdə iştirakını Azərbaycanın növbəti möhtəşəm uğuru kimi dəyərləndirib.
O, Azərbaycan Prezidenti İlham Əliyevin Forumun açılış mərasimindəki nitqində səsləndirdiyi fikirlərə diqqəti cəlb edərək dövlət başçısının müsəlman aləmində baş verən xoşagəlməz proseslər, Avropada miqrantlara qarşı münasibətin pisləşməsi, ayrı-seçkiliyə meyilli siyasi qüvvələrin fəallaşması, eləcə də beynəlxalq ictimaiyyətin Ermənistan-Azərbaycan, Dağlıq Qarabağ münaqişəsi ilə bağlı ikili standartlardan çıxış etməsi kimi məsələlərə dair səsləndirdiyi fikirləri qeyd edib.
A.Sertеl Forum çərçivəsində keçirilən “dəyirmi masa”lardan da bəhs edib, özünün də iştirak etdiyi “Rəqəmsal dövrdə medianın transformasiyası: inkişafın yeni meyilləri” adlı “dəyirmi masa”da müzakirə olunan məsələlərin əhəmiyyətini vurğulayıb. O, həmçinin Forum iştirakçılarının Azərbaycanın müxtəlif bölgələrinə təşkil olunmuş səfərlərinin Prezident İlham Əliyevin rəhbərliyi ilə ölkədə həyata keçirilən hərtərəfli inkişaf göstəriciləri ilə tanışlıq baxımından önəmli olduğunu diqqətə çatdırıb.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
