Türkiyə təhlükəsizlik qüvvələri son bir həftədə 87 terrorçunu zərərsizləşdirib
İstanbul, 2 noyabr, AZƏRTAC
Türkiyənin təhlükəsizlik qüvvələrinin PKK/KCK/PYD-YPG, İŞİD və FETÖ terror təşkilatlarına qarşı mübarizəsi ölkə daxilində və sərhədlərdən kənarda qətiyyətlə davam edir. İraq və Suriyanın şimalı da daxil olmaqla, aparılan uğurlu əməliyyatlar nəticəsində son bir həftədə 87 terrorçu zərərsizləşdirilib. Beləliklə, zərərsizləşdirilən terrorçu sayı bu il 1802-yə, əməliyyatların başladığı 2015-ci il iyulun 24-dən isə 39 min 145-ə çatıb.
AZƏRTAC xəbər verir ki, bu barədə Türkiyə Milli Müdafiə Nazirliyinin media və ictimaiyyətlə əlaqələr üzrə müşaviri Zeki Aktürk nazirliyin həftəlik hesabatında bildirib.
Qeyd edilib ki, İraqın şimalında “Pəncə-Kilid” əməliyyatı çərçivəsində indiyədək 630 terrorçu zərərsizləşdirilib, çox sayda silah-sursat ələ keçirilib, terrorçulara məxsus 771 sığınacaq yararsız hala gətirilib.
Suriyadakı əməliyyat bölgəsində isə il ərzində 425 təxribat və hücum cəhdinin qarşısı alınıb, 23-ü son bir həftədə olmaqla, ümumilikdə 1321 terrorçu zərərsizləşdirilib.
Məlumata əsasən, son bir həftədə qanunsuz yollarla Türkiyə sərhədlərini keçməyə cəhd edən 561 nəfər saxlanılıb. Onlardan beşinin FETÖ terror təşkilatının üzvü olduğu müəyyən edilib. Bu müddət ərzində 2 min 452 nəfərin sərhədi keçməsinin qarşısı alınıb. Bu rəqəm il ərzində 10 min 974 nəfər təşkil edib. Onlardan 560-nın terror təşkilatlarının, o cümlədən 394-nün FETÖ üzvü olduğu müəyyənləşdirilib.
Bölmənin digər xəbərləri
