Türkiyəli ekspert: Ermənistan Azərbaycanın çağırışlarına qulaq asmalı və düşmənçilikdən əl çəkməlidir
Ankara, 22 may, AZƏRTAC
Azərbaycan həqiqətlərinin təbliğinə təkcə dövlət qurumları deyil, vətəndaş cəmiyyəti strukturları da çalışmalıdır. Bu, Azərbaycan haqqında məlumatları və 44 günlük Vətən müharibəsində qazanılan tarixi Qələbənin əhəmiyyətini xarici ölkələrin sakinlərinə çatdırmağın yeganə yoludur.
Bu fikirləri AZƏRTAC-a müsahibəsində Ankaranın Hacı Bayram Vəli Universitetinin dosenti Levent Ersin Orallı ifadə edib.
Onun fikrincə, ayrı-ayrı siyasətçilərin bəyanatları istənilən beynəlxalq effekti verə bilməz, lakin mövzu bütün cəmiyyət tərəfindən təbliğ edilərsə və qardaş ölkələr tərəfindən dəstəklənərsə, onda vəziyyət dəyişəcək.
Orallı Qərbi Azərbaycana qayıdış mövzusunda beynəlxalq tədbirləri misal çəkərək qeyd edib ki, belə platformalar Qərbi Azərbaycanın ilk sakinlərinin tarixən üzləşdiyi problemlər barədə ictimaiyyəti məlumatlandırmaq üçün ən yaxşı vasitədir.
“Azərbaycan işğal altındakı torpaqlarını azad etməklə tarixi ədalətə nail oldu. Yeni səhifə açıldı. Bu gün regionumuza atəşkəs deyil, davamlı sülh lazımdır. Beləliklə, biz imkanları birləşdirə və Türk dünyasının ortaq məqsədləri naminə bir araya gələ biləcəyik”, - deyən türkiyəli ekspert vurğulayıb ki, sıx əməkdaşlıq olmasa, bir sıra Qərb dövlətlərinin timsalında regiondankənar aktorlar regionda öz ssenarilərini həyata keçirməyə cəhd edə bilər.
O əlavə edib: “Ölkələrimizin səbri tükənib. Biz artıq Fransanın, Kanadanın və başqa ölkələrin yalanlarına qulaq asa bilmirik. Lobbiçilik fəaliyyətini gücləndirmək, regionla bağlı həqiqətləri bütün ölkələrin sakinlərinə çatdırmaq, Berlin, London, Paris, Stokholm və digər paytaxtlarda konfranslar təşkil etmək lazımdır. Bunu Azərbaycan və Türkiyədəki qeyri-hökumət təşkilatları da etməlidir”.
Universitetin dosenti əmin olduğunu bildirib ki, Ankara və Bakının bir çox rəqibi öz cəmiyyətlərinin müqavimətindən qorxsalar, tarixi qərəzlərə arxalanmağa və mənfi ssenarilər həyata keçirməyə cəsarət etməyəcək.
Onun sözlərinə görə, dünya ictimaiyyəti ermənilərin tezislərinin yalan olduğunu getdikcə daha aydın dərk edir. “Bu, həm də qondarma 1915-ci il hadisələrinə aiddir. Türkiyə 10 il əvvəl bütün milli arxivlərin açıldığını elan etdi, lakin Ermənistan tarixi faktları qəbul etmək istəmədiyi üçün geri addım atdı. Bu gün biz İrəvandan konstitusiyaya dəyişiklik edəcəyini və gerbinə yenidən baxacağını - son nəticədə düşmənçilikdən əl çəkəcəyini gözləyirik”, -deyə Orallı bildirib.
O qeyd edib ki, Ermənistan Azərbaycanın çağırışlarına qulaq asmalı və regionda sabitliyin yeni arxitekturasının bir hissəsi olmalıdır. “Ermənilərdən tələb olunan yeganə addım Azərbaycanın müəyyən etdiyi Yol Xəritəsinə əməl etməkdir”, -deyə ekspert vurğulayıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
