Türkiyəli professor: Zəngilanda icra olunan layihələr beynəlxalq platformalarda diqqət çəkir
Bakı, 27 may, AZƏRTAC
Zəngilan bölgəsində həyata keçirilən yenidənqurma və məskunlaşma siyasəti Azərbaycanın müharibədən sonrakı dayanıqlı inkişaf strategiyasının mühüm nümunəsidir. Regionda icra olunan layihələr şəhərsalma, logistika və iqtisadi inteqrasiya baxımından beynəlxalq platformalarda diqqət çəkir.
Bu fikirləri AZƏRTAC-a açıqlamasında Dokuz Eylül Universitetinin Biznes fakültəsinin müəllimi, Beynəlxalq ticarət və biznes kafedrasının professoru Ülviyyə Sanılı Aydın deyib. Professor bildirib ki, Prezident İlham Əliyevin 2026-cı ilin may ayında Zəngilana səfəri zamanı səsləndirdiyi fikirlər yalnız regional inkişaf məsələlərini deyil, həm də müharibədən sonrakı şəhərsalma, yenidən məskunlaşma və iqtisadi canlanma siyasətlərini əhatə edib. Onun sözlərinə görə, keçmiş məcburi köçkünlərin geri dönüşü, yeni yaşayış məntəqələrinin qurulması, nəqliyyat infrastrukturunun inkişafı və bölgənin iqtisadi potensialının yenidən formalaşdırılması BMT-nin Ümumdünya Şəhərsalma Forumunun 13-cü Sessiyasında (WUF13) müzakirə olunan “dayanıqlı şəhərlər”, “böhrandan sonrakı yenidənqurma” və “davamlı şəhər transformasiyası” mövzuları ilə üst-üstə düşüb.
O qeyd edib ki, Zəngilanda həyata keçirilən “Ağıllı kənd” layihəsi müasir şəhərsalma konsepsiyasının ən diqqətçəkən nümunələrindən biridir: “Layihə rəqəmsal infrastruktur, bərpaolunan enerji, ağıllı kənd təsərrüfatı sistemləri və müasir yaşayış konsepsiyasını bir araya gətirir. Bu model WUF13 çərçivəsində müzakirə olunan iqlim dayanıqlılığı və texnologiya dəstəkli davamlı həyat yanaşmaları ilə tam uyğunluq təşkil edir”.
Professor vurğulayıb ki, Zəngilan Beynəlxalq Hava Limanı, avtomobil və dəmir yolu layihələri bölgənin yalnız yenidən məskunlaşdırılmasına deyil, həm də Cənubi Qafqazın əsas logistika və tranzit mərkəzlərindən birinə çevrilməsinə xidmət edir. Onun sözlərinə görə, Zəngəzur dəhlizi çərçivəsində həyata keçirilən layihələr Azərbaycanın əsas hissəsini Naxçıvan və Türkiyə ilə birləşdirməklə yanaşı, Şərq-Qərb və Şimal-Cənub ticarət marşrutlarının inteqrasiyasında da mühüm rol oynayacaq.
“Prezident İlham Əliyevin Zəngilanın beynəlxalq logistika mərkəzinə çevriləcəyi ilə bağlı vurğuladığı strateji yanaşma bölgədə həyata keçirilən infrastruktur layihələrində aydın şəkildə görünür. Hava limanı, magistral yollar və dəmir yolu xətləri regionun həm yaşayış, həm də ticarət və nəqliyyat baxımından inkişafını hədəfləyir”, - deyə professor əlavə edib. O bildirib ki, Zəngilanın İran sərhədində yerləşməsi və Orta Dəhliz üzərindəki mövqeyi bölgəni gələcəkdə Qafqaz-Orta Asiya-Türkiyə xəttində mühüm logistika qovşaqlarından birinə çevirə bilər.
Professorun fikrincə, Zəngilan artıq yalnız yenidən qurulan sərhəd bölgəsi deyil, həm də Cənubi Qafqazda formalaşan yeni iqtisadi coğrafiyanın strateji mərkəzlərindən biridir.
Bölmənin digər xəbərləri
