Türkiyənin İzmir şəhərində Xocalı faciəsinin 22-ci ildönümünə həsr olunmuş anım mərasimi keçirilmişdir
İzmir, 24 fevral (AZƏRTAC, Nihat Budaqov). Xocalı faciəsinin 22-ci ildönümü ilə əlaqədar Türkiyədə keçirilən silsilə tədbirlər çərçivəsində Azərbaycan Respublikasının Ankaradakı səfirliyinin və Azərbaycan Dialoq və Qardaşlıq Dərnəyinin (ADKA-DER) birgə təşkilatçılığı ilə İzmir şəhərindəki Tepekule Kongre Mərkəzində “Dünya Xocalını tanıdır” adlı anım mərasimi keçirilmişdir.
AZƏRTAC xəbər verir ki, tədbirdə əvvəlcə Xocalı soyqırımı qurbanlarının xatirəsi bir dəqiqəlik sükutla yad olunmuş, Azərbaycanın və Türkiyənin dövlət himnləri səsləndirilmişdir.
Sonra Azərbaycanın Ankaradakı səfirliyinin təhsil müşaviri Nəcibə Nəsibova çıxış edərək tədbirin “Xocalıya ədalət həftəsi” çərçivəsində keçirildiyini vurğulamış, əsas məqsədin Xocalı soyqırımını Türkiyədə təhsil alan xarici tələbələrin dili ilə dünyaya anlatmaq olduğunu bildirmişdir.
Tədbirdə Azərbaycan Respublikası Milli Məclisinin deputatı Qənirə Paşayeva Xocalı soyqırımının beynəlxalq müstəvidə tanıdılmasında ulu öndər Heydər Əliyevin rolundan danışmışdır. Bildirilmişdir ki, Prezident İlham Əliyev Azərbaycan həqiqətlərinin və Xocalı soyqırımının dünya ictimaiyyətinə çatdırılmasını səfirliklər və diaspor təşkilatları qarşısında vacib məsələ kimi müəyyənləşdirmişdir.
Vurğulanmışdır ki, bu gün Heydər Əliyev Fondu Xocalı faciəsi ilə bağlı həqiqətlərin dünya ictimaiyyətinə daha geniş coğrafiyada çatdırılması, onun soyqırımı aktı kimi tanıdılması istiqamətində mühüm addımlar atır. Fondun dəstəyi ilə müxtəlif ölkələrdə Xocalı soyqırımının qurbanlarının xatirəsini anım mərasimləri keçirilir. Xocalı soyqırımı haqqında bütün faktların dünya dövlətlərinə çatdırılması istiqamətində atılan ən mühüm addımlardan biri də Fondun vitse-prezidenti Leyla Əliyevanın təşəbbüsü ilə təsis edilmiş, bu gün 50-dən artıq ölkədə yüzlərlə könüllünün iştirakı ilə uğurla davam etdirilən “Xocalıya ədalət!” beynəlxalq kampaniyasıdır.
Sonra Azərbaycan Dialoq və Qardaşlıq Dərnəyinin direktoru Məhəmməd Əli Quru “Dünya Xocalını tanıdır, sən də tanıt” devizi ilə reallaşdırılan layihənin əsas hədəfinin ermənilər tərəfindən 613 Azərbaycan vətəndaşının amansızcasına qətlə yetirildiyini, 487 nəfərin yaralandığını, 1275 nəfərin əsir götürüldüyünü, insanlığa yaraşmayan bu faciə haqqında fərqli mədəniyyətlərdən olan əcnəbi tələbələrin daha yaxından öyrənmələrini, Azərbaycan xalqının başına gətirilən zülmləri öyrənərək müxtəlif sənət növlərində anlatmasını təşkil etməkdən ibarətdir olduğunu demişdir.
Məlumat verilmişdir ki, yanvar ayından başlanılan layihəyə dünyanın 29 ölkəsindən olan xarici tələbə qoşulmuşdur. Onlar www.dunyahocaliyianlatiyor.com/az saytına daxil olaraq 53 müxtəlif sənət növündə Xocalını anladacaq şəkildə hazırladıqları işlərini təqdim etmişlər.
Sonda ən yaxşı 10 layihənin müəllifi mükafatlandırılmışdır.
Tədbirdə Türkiyədə təhsil alan xarici tələbələrin Xocalı soyqırımına həsr edilmiş rəsm əsərləri də nümayiş olunmuşdur.
Bölmənin digər xəbərləri
