Türkmənistana Ümumdünya Ticarət Təşkilatının müşahidəçi statusu verilib
Aşqabad, 22 iyul, AZƏRTAC
Ümumdünya Ticarət Təşkilatının (ÜTT) Cenevrədəki mənzil-qərargahında Baş Şuranın növbəti iclası zamanı yekdilliklə Türkmənistana ÜTT-də müşahidəçi statusu verilməsi barədə qərar qəbul edilib.
AZƏRTAC ölkənin Xarici İşlər Nazirliyinə istinadla xəbər verir ki, Türkmənistan tərəfindən təşkil olunan videokonfransda BMT-nin Cenevrədəki bölməsi yanında Türkmənistanın daimi nümayəndəsi, həmçinin aidiyyəti qurumların nümayəndələri iştirak ediblər.
Ölkənin bu statusa malik olması Türkmənistanın milli iqtisadiyyatının dinamik inkişafına, xarici ticarətdə mövqelərinin möhkəmləndirilməsinə, çoxtərəfli əməkdaşlığa, xaricdən investisiya cəlb edilməsinə və beynəlxalq ticarət əlaqələrini inkişaf etdirməyə xidmət edəcək.
Hazırda 164 dövlət ÜTT-nin üzvüdür. Türkmənistan bu təşkilatda müşahidəçi statusu alan 25-ci ölkə olub.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
