Ukrayna Azərbaycanlı Gənclər İttifaqı “Xocalı ayı” elan edib
Kiyev, 12 fevral, AZƏRTAC
Ukrayna Azərbaycanlı Gənclər İttifaqı (UAGİ) ölkədə elan olunmuş “Xocalı ayı” çərçivəsində qarşıdakı tədbirlər planını təsdiqləyib.
Təşkilatın mətbuat xidmətindən AZƏRTAC-a bildirilib ki, idarə heyətinin və fəallarının iclasında UAGİ-nin sədri İlhamə Allahverdiyeva Xocalı soyqırımı haqqında tarixi həqiqətin dünya, o cümlədən Ukrayna ictimaiyyətinə çatdırılmasının vacibliyini qeyd edib. Vurğulayıb ki, xalqımızın düçar olduğu faciəyə mütərəqqi bəşəriyyət tərəfindən düzgün hüquqi qiymət verilməyənədək, biz təbliğat işlərini aktiv davam etdirməliyik.
UAGİ dörd ildir ki, fevralı “Xocalı ayı” elan edir. Tədbir Heydər Əliyev Fondunun vitse-prezidenti, Rusiya Azərbaycanlı Gənclər Birliyinin (RAGB) rəhbəri Leyla Əliyevanın təşəbbüsü ilə təşkil olunmuş “Xocalıya ədalət” beynəlxalq təbliğat və məlumatlandırma kampaniyası çərçivəsində keçirilir.
İclasda UAGİ-nin İdarə Heyəti Şurasının üzvləri “Xocalı ayı”nın keçirilməsinə yeni yanaşmaları, tədbirlər planı çərçivəsində Ukraynanın paytaxtında və təşkilatın nümayəndəliklərinin fəaliyyət göstərdiyi regionlarında keçiriləcək tədbirləri müzakirə ediblər.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
