Ulu öndər Heydər Əliyevin anadan olmasının 99-cu ildönümü Rabatda qeyd edilib
Rabat, 13 may, AZƏRTAC
AZƏRTAC xəbər verir ki, Mərakeş Milli Kitabxanasında nüfuzlu ictimai xadimlərin, əcnəbi diplomatların iştirak ilə keçirilən tədbirdə ilk olaraq Azərbaycan və Mərakeşin Dövlət himnləri səsləndirilib, ulu öndər Heydər Əliyevin ruhu bir dəqiqəlik sükutla yad edilib.
Tədbiri giriş nitqi ilə açan səfir Oktay Qurbanov çıxış edərək, Ulu Öndərin həyatı və siyasi fəaliyyəti barədə tədbir iştirakçılarına ətraflı məlumat verib, müasir Azərbaycanın hərtərəfli inkişafının, onun qüdrətli bir dövlət kimi formalaşmasının birbaşa Ümummilli Liderin adı ilə bağlı olduğunu diqqətə çatdırıb.
Səfir ulu öndər Heydər Əliyevin dövlətçilik strategiyasında iqtisadi inkişaf və ordu quruculuğunun prioritet istiqamətlər olduğunu qeyd edib. Diplomat bu uzaqgörən dövlətçilik strategiyasını uğurla davam etdirən Prezident İlham Əliyevin siyasəti nəticəsində torpaqlarımızın işğaldan azad edildiyini, bununla da ölkəmizin suverenliyinin və ərazi bütövlüyünün bərpa olunduğunu bildirib. O, ulu öndər Heydər Əliyevin 1969-1982-ci illərdə Azərbaycana rəhbərliyi zamanı öz müdrik siyasəti ilə gələcək iqtisadi inkişaf strategiyasını hazırlayaraq, ölkəmizin uğurlu inkişafında mühüm rol oynayan böyük zavod və fabriklərin ölkəmizdə tikilməsinə nail olduğunu diqqətə çatdırıb.
Daha sonra səfir O.Qurbanov Azərbaycan-Mərakeş arasındakı dostluq münasibətlərindən söz açaraq, iki ölkə arasında təməlinin Ulu Öndər Heydər Əliyevin 1994-cü ilin dekabrında Kasablanka şəhərində keçirilən İslam Əməkdaşlıq Təşkilatının VII Zirvə toplantısında iştirak etmək üçün Mərakeş Krallığına səfər zamanı mərhum Kral II Həsən arasında keçirilmiş görüşdə qoyulduğunu vurğulayıb.
Səfir iki ölkə arasında Ulu Öndərlə Kral II Həsən tərəfindən təməli qoyulmuş bu münasibətlərin bu gün də Prezident İlham Əliyev və əlahəzrət Kral VI Məhəmməd tərəfindən uğurla davam etdirildiyini qeyd edib.
Səfir Azərbaycanla Mərakeşin ikitərəfli münasibətlərinin bugünkü səviyyəsinin, o cümlədən beynəlxalq təşkilatlar çərçivəsində əməkdaşlığının, bütün dövrlərdə hər iki ölkənin bir-birilərinin suverenliyini dəstəkləməsinin bu əlaqələrin sarsılmaz əbədi dostluq münasibətlərinə sübut olduğunu bildirib, 44 günlük Vətən müharibəsi zamanı Azərbaycana ilk dəstək bəyanatını verdiyi üçün bu addımın dövlətimiz və xalqımız tərəfindən yüksək qiymətləndirildiyini qeyd edib.
Səfir O.Qurbanov tədbirin keçirilməsinə şərait yaradıldığı üçün Milli Kitabxananın direktoru Məhəmməd Əl-Fərrana təşəkkürünü bildirib.
Milli Kitabxananın direktoru M.Əl-Fərran öz çıxışında rəhbərlik etdiyi qurumda ulu öndər Heydər Əliyev kimi dahi bir liderlə bağlı tədbirin keçirilməsinin onlar üçün şərəf olduğunu qeyd edərək, Ümummilli Lider haqqında ilk dəfə bir müsəlmanın SSRİ kimi bir dövlətdə belə yüksək vəzifəyə seçilməsinin müsəlman ölkələrinə səs saldığı zaman tanıdığını və bu hadisədən iftixar hissi keçirdiyini vurğulayıb. M.Əl-Fərran hazırda ölkələrimiz arasında münasibətlərin sürətlə inkişaf etməsində Kral VI Məhəmməd və Prezident İlham Əliyevin şəxsi dostluq münasibətlərinin böyük rolu olduğunu qeyd edib.
Rabatdakı V Məhəmməd Universitetinin Ədəbiyyat və humanitar fənlər fakültəsinin dekanı professor Cəmaləddin Həni çıxışında deyib: “Ulu öndər Heydər Əliyevin adı elə böyük bir addır ki, müasir dövrümüzdə Azərbaycan ilə sıx bağlıdır. Onun müdrikliyi, daxili və xarici siyasəti, Azərbaycanın tarixi, regional, beynəlxalq və incə dövlətçilik strategiyasına öz töhfələrini verib. Məhz onun siyasəti nəticəsində müasir Azərbaycan mədəni, iqtisadi cəhətdən inkişaf edərək, regional gücə çevrilib”.
Tədbirdə çıxış edən Mərakeş-Azərbaycan Dostluq Cəmiyyətinin sədri M.Fəqiri II Həsən və ümummilli lider Heydər Əliyevin öz dövlətləri və xalqları üçün etdiyi xidmətlər arasında müqayisələr apararaq, xalqların ürəyində əbədi yer qazanmış böyük şəxsiyyətlərin ümumi cəhətlərini təhlil edib.
Sovetlər dönəmində Bakıda təhsil almış Azərbaycan Tibb Universitetinin məzunu Məhəmməd Rişu Azərbaycanla bağlı xatirələrini bölüşərək, 20 Yanvar faciəsi zamanı da Bakıda olduğunu, ulu öndər Heydər Əliyevin həmin çətin günlərdə xalqına dəstək olması barədə fədakarlıqlarından söhbət açıb.
Tədbirdə Mərakeş-Azərbaycan Dostluq Cəmiyyətinin üzvləri ilə yanaşı, Azərbaycanda və keçmiş SSRİ-də təhsil almış şəxslər də iştirak ediblər.
Səfir O.Qurbanov yerli televiziya kanallarına müsahibələr verib, tədbirlə bağlı yerli KİV-də - geniş oxucu kütləsinə malik “Bəyan Əl-yaum”, “Əl-İslah”, “Əl-Aləm” qəzetlərində, habelə elektron media şəbəkələrində məlumat və məqalələr dərc olunub.
Nigar Cəfərli
AZƏRTAC-ın xüsusi müxbiri
Rabat
Bölmənin digər xəbərləri
