Ümummilli Liderin 95 illiyi münasibətilə İranda xeyriyyə aksiyası keçirilib
Tehran, 10 may, AZƏRTAC
Xalqımızın ümummilli lideri Heydər Əliyevin 95 illik yubileyi münasibətilə mayın 10-da Azərbaycanın İrandakı səfirliyi xeyriyyə aksiyası keçirib.
AZƏRTAC xəbər verir ki, səfirliyin əməkdaşları Tehrandakı “Qədir” Xeyriyyə Müəssisəsinin İmam Əli Kompleksindəki fiziki və zehni qüsurlu 300 qıza sovqat paylayıb.
Azərbaycanın İrandakı səfirliyi Ulu Öndərin öz fəaliyyətində daim humanizm prinsiplərini əsas tutmasına istinad edərək hər il mayın 10-da bu müəssisəni ziyarət edərək burada yaşayan və yardıma ehtiyacı olan xəstə qız uşaqlarını sevindirir.
Səfir Bünyad Hüseynov müəssisənin əməkdaşları ilə söhbətində Heydər Əliyevin həyat və fəaliyyəti barədə danışıb. Bildirib ki, Azərbaycan xalqı tarixən öz mərhəməti, humanizmə sadiqliyi ilə seçilib. Təsadüfi deyil ki, həm Sovet İttifaqı, həm də müstəqillik illərində Azərbaycana rəhbərlik edən Heydər Əliyev fəaliyyətinin bütün dövrlərində insanpərvərliyi, humanizmi, mənəvi dəyərləri, şəfqəti hər şeydən uca tutub. Azərbaycanda yaradılmış Heydər Əliyev Fondu bu gün öz fəaliyyətini məhz Ümummilli Liderin humanizm prinsiplərinin əsasında qurub. Fondun prezidenti Mehriban Əliyeva genişmiqyaslı layihələr həyata keçirərək həm ölkədə, həm də xaricdə böyük xeyriyyəçilik aksiyaları təşkil edir. Fondun vitse-prezidenti Leyla Əliyeva bayram günlərində və əlamətdar günlərdə sağlamlıq imkanları məhdud olan uşaqlarla görüşür, onlar üçün mədəni proqramlar təşkil edir. Heydər Əliyev Fondunun bu tədbirləri cəmiyyətdə humanizmin daha geniş vüsət almasına, insanlarda mərhəmət hissinin aşılanmasına xidmət edir.
Diplomat Ermənistan-Azərbaycan, Dağlıq Qarabağ münaqişəsi barədə də məlumat verib. Qeyd edilib ki, ermənilərin təcavüzü nəticəsində öz doğma yurdlarını tərk etmək məcburiyyətində qalan 1 milyon azərbaycanlı qaçqın və məcburi köçkün vəziyyətindədir. Ermənilərin təcavüzü nəticəsində Azərbaycanın Naxçıvan Muxtar Respublikası da blokada şəraitində yaşamaq məcburiyyətindədir. Lakin bütün bunlara baxmayaraq, Azərbaycan iqtisadi cəhətdən inkişaf edərək dünya birliyində öz layiqli yerini tutub. Beynəlxalq təşkilatların rəyinə görə, Azərbaycan bu gün dünyada ən dinamik inkişaf edən dövlətlərdən biridir. Azərbaycanda sosial layihələr dövlət büdcəsindən maliyyələşdirilir. Buna görə də Azərbaycanın dövlət büdcəsi sosialyönümlü büdcə kimi xarakterizə edilir.
“Qədir” Xeyriyyə Müəssisəsinin İmam Əli Kompleksinin Direktorlar Şurasının sədri Hüseyn Zackaniha minnətdarlığını bildirərək Azərbaycan səfirliyinin belə aksiyasından təsirləndiyini deyib. O bildirib ki, bu cür müəssisələrin sakinlərinin yad edilməsi insanda sözlə ifadə olunmayan duyğular yaradır. Hər kəs humanizmin, xeyriyyəçiliyin müasir zamanda nə qədər mühüm və əhəmiyyətli olduğunu dərindən başa düşür.
H.Zackaniha Ermənistanın Azərbaycanın Dağlıq Qarabağ bölgəsinə təcavüzü zamanı Zəngilan və Cəbrayıldan qaçqın düşərək İrana pənah gətirən insanlar üçün salınmış çadır şəhərciyində İranın Qırmızı Aypara Cəmiyyətinin nümayəndəsi kimi işlədiyini bildirib. O, həmin dövrdə Heydər Əliyevin çadır şəhərciyinə gələrək insanların problemləri ilə maraqlandığının, yaşlılara və uşaqlara necə qayğı ilə yanaşdığının şahidi olduğunu söyləyib. Sədr Heydər Əliyevin layiqli davamçısı Prezident İlham Əliyevin uğurlu siyasəti nəticəsində Azərbaycanın inkişaf etməsindən çox sevindiyini deyib. Vurğulayıb ki, Azərbaycanın dövlət büdcəsinin sosialyönümlü olması və Heydər Əliyev Fondunun qayğıya ehtiyacı olanları himayəyə götürməsi mərhəmət nümayişidir.
Sonda müəssisədə yaşayanların gündəlik istifadə etdikləri dərmanların bir aylıq xərci və “Made in Azerbaijan” brendi ilə istehsal olunan qida məhsullarından ibarət sovqat müəssisəyə təqdim edilib.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
