UNESCO: “Hirkan meşələri” transmilli nominasiya sənədi Ümumdünya İrs Mərkəzinə təqdim edilib
Paris, 2 fevral, AZƏRTAC
Azərbaycan Respublikası və İran İslam Respublikasının birgə hazırladığı “Hirkan meşələri” adlı transmilli nominasiya sənədi UNESCO-nun Ümumdünya İrs Siyahısına daxil edilməsi üçün Ümumdünya İrs Mərkəzinə təqdim edilib.
AZƏRTAC xəbər verir ki, nominasiya sənədini Azərbaycan Respublikası adından ölkəmizin UNESCO yanında daimi nümayəndəsi, səfir Elman Abdullayev, İran İslam Respublikası adından isə mədəni irs nazirinin müavini Məhəmməd Həsən Talebiyan imzalayıblar.
“Hirkan meşələri” nominasiya sənədi 2022-ci ilin iyun-iyul aylarında keçiriləcək Ümumdünya İrs Komitəsinin 45-ci sessiyası zamanı Komitə üzvləri tərəfindən nəzərdən keçiriləcəkdir.
Hirkan meşələri ilk dəfə olaraq 2019-cu ilin iyun-iyul aylarında Bakıda keçirilən Ümumdünya İrs Komitəsinin 43-cü sessiyası zamanı İran İslam Respublikası tərəfindən siyahıya daxil edilib və Azərbaycan tərəfi sözügedən nominasiyaya qoşulmağa dəvət olunub.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
