MƏDƏNİYYƏT
“VAQİF” OPERASI YENİ QURULUŞDA
Azərbaycan Dövlət Akademik Opera və Balet Teatrında xalq artisti Ramiz Mustafayevin “Vaqif” operasının yeni quruluşda ilk tamaşası olmuşdur.
Teatrın baş rejissoru Hafiz Quliyev xalq şairi Səməd Vurğunun eyni adlı pyesinin motivləri əsasında yazılmış operaya qocaman bəstəkarın 75 illik yubileyi münasibətilə yeni quruluş vermişdir.
Xalqımızın şanlı keçmişindən, azadlıq uğrunda mübarizəsindən bəhs edən 3 pərdə, 6 şəkilli tamaşada Vaqif rolunu vokalçıların Bülbül adına I beynəlxalq müsabiqəsinin laureatı, gənc solist Həsən Enami ifa etmişdir.
Anşlaqla keçən operada əməkdar artistlər Elxan Əhədzadə (Qacar), Şahlar Quliyev (Eldar), Əli Əsgərov (Vəzir) və başqaları çıxış etmişlər.
Tamaşanın musiqi rəhbəri və dirijoru əməkdar incəsənət xadimi Cavanşir Cəfərovdur.