Vatikan, 22 sentyabr, AZƏRTAC

Avropanın bütün ölkələri şüarlardan və münaqişələrdən uzaq, Aralıq dənizindəki miqrasiya problem ilə bağlı mürəkkəb və dramatik vəziyyətə görə məsuliyyəti birlikdə öz üzərlərinə götürməlidir.

AZƏRTAC xəbər verir ki, bunu Müqəddəs Taxt-Tacın dövlət katibi kardinal Pietro Parolin deyib.

Kardinal hazırda Aralıq dənizində hökm sürən miqrasiya probleminin birgə və uzaqgörən baxışlarla həll olunmasının zəruriliyini qeyd edib.

“Miqrasiya problemi mürəkkəb məsələdir. Bu, sadə və dərhal həlli yolları olmayan, şüarlar və vədlərlə deyil, daha yaxşı qəbul şəraiti, sülh və sabitliyi təmin etmək üçün resursların səfərbər olunması və birgə səylər ilə həll edilməlidir. Miqrantların və qaçqınların qayğısına qalmaq öhdəliyinə sadiq olanlar hökumətlərin dəstəyi olmadan bu mürəkkəb vəziyyətlərlə üzülüşə bilməzlər. Onların milli və beynəlxalq səviyyədə həmrəyliyə ehtiyacı var. Hazırda təkcə İtaliyada deyil, Avropada da siyasi səviyyədə birdən çox fəaliyyət planı müzakirə olunur. Avropanın bütün ölkələri Aralıq dənizindəki vəziyyətə görə məsuliyyəti birlikdə öz üzərinə götürməlidir”, - deyə dövlət katibi vurğulayıb.

Nihad Budaqov

AZƏRTAC-ın xüsusi müxbiri

Vatikan