Volodimir Zelenski Avropa qarşısında yeni tələblər irəli sürüb
Bakı, 17 fevral, AZƏRTAC
Ukraynanın Qərb ölkələrindən İsrailə göstərilən oxşar təhlükəsizlik zəmanətlərinə ehtiyacı var.
AZƏRTAC xəbər verir ki, bunu Ukrayna Prezidenti Volodimir Zelenski NBC telekanalına müsahibəsində deyib.
“İsrail NATO-nun üzvü deyil, bəs onda bu ölkələr ona nə üçün kömək etdi? İran raketlərini vurdular, amma İsrail alyansın üzvü deyil. Bu o deməkdir ki, onların ABŞ, Fransa, Böyük Britaniya və digər müttəfiqlərindən xüsusi təhlükəsizlik zəmanəti var. Məncə, bizim də eyni zəmanətə ehtiyacımız var”, - deyə Ukrayna lideri bildirib.
Bundan əlavə, Zelenski ölkəsi üçün hər hansı digər irimiqyaslı işğal halında qabaqlayıcı tədbir rolunu oynayacaq çoxlu raket verilməsini tələb edib.
Şənbə günü ABŞ hakimiyyətinin Avropaya ünvanladığı tənqidlər fonunda Volodimir Zelenski bildirib ki, Ukrayna NATO üzvlüyündən imtina etməyəcək. Lakin alyansa qoşulmaq üçün real perspektiv olmadığı halda, o, sərhədləri Ukraynanın şərqi, Baltikyanı dövlətlər, Belarus və Finlandiyadan keçəcək “başqa NATO” barədə düşünməyə başlayıb.
Bundan əlavə, Zelenski Avropanı özünü təmin etməyə və birləşməyə çağıraraq, onun gələcəyinin başqasından deyil, özündən asılı olduğunu deyib.
Bölmənin digər xəbərləri
