Vurğun Hüseynov: Etiraf edirəm ki, komanda daxilində çatışmazlıqlar var
Bakı, 22 sentyabr, AZƏRTAC
Dörd xalla 9-cu pillədə qərarlaşan komandamızın daha yaxşı yerə layiq olduğunu düşünürəm. Baş məşqçimiz yenidir, kollektivimiz isə yayda yığılıb. Qarşıda bizi çox oyunlar gözləyir. İnanıram ki, uğurlu nəticələrimizin sayı artacaq.
AZƏRTAC xəbər verir ki, bu sözləri “Kəpəz”in kapitanı Vurğun Hüseynov komandanın mətbuat xidmətinə açıqlamasında mövsümün ilk 6 turundakı nəticələrini şərh edərkən deyib.
Onun sözlərinə görə, mövsümün başlanğıcında “Neftçi” üzərində qələbə qazanmalarına baxmayaraq, sonrakı oyunların nəticələri qənaətbəxş olmayıb: “Etiraf edirəm ki, komanda daxilində çatışmazlıqlar var. Baş məşqçimiz bunları təhlil edir və bu barədə bizi məlumatlandırır. Çalışırıq ki, oyundan-oyuna bu problemləri azaldaq. Son matçlardakı səhvlər komanda şəklində deyil, fərdi səhvlərdir. Bunları yoluna qoymaq üçün əlimizdən gələni edirik”.
Otuz beş yaşlı oyunçu sağaldığını və komanda ilə birgə məşqlərə başladığını vurğulayıb: “Neftçi” ilə oyundan əvvəl gözlənilməz zədə aldım. Ancaq hazırda tam sağalmışam. Baş məşqçi şans verərsə, qarşıdakı görüşlərdə iştirak edərəm. Biz bir ailəyik, qələbə də, məğlubiyyət də hamımıza təsir edir. Futbolçuların həvəsdən düşməmələri üçün təcrübəli bir oyunçu kimi, əlimdən gələni edirəm”.
Qeyd edək ki, Gəncə təmsilçisi sentyabrın 24-də Premyer Liqanın VII turunda “Sabah”la qarşılaşacaq.
Bölmənin digər xəbərləri
