XARİCİ İŞLƏR NAZİRİNİN MÜAVİNİ ARAZ ƏZİMOVUN KANADAYA SƏFƏRİ
Qeyd edək ki, Araz Əzimov martın 27-28-də Kanadaya səfəri zamanı Xarici İşlər Nazirliyində həmkarı Cim Rayt və bir sıra digər yüksək səviyyəli şəxslərlə müzakirələr aparmışdır. Səfərdən məqsəd Kanada ilə hərbi-siyasi, təhlükəsizlik sahəsində məsləhətləşmələrin keçirilməsidir. Azərbaycanın Ottavadakı səfirliyinin yaydığı məlumata görə, görüşlər zamanı qlobal terrorçuluqla, beynəlxalq mütəşəkkil cinayətkarlıqla mübarizə, Cənubi Qafqazda vəziyyət, NATO, ATƏT və digər beynəlxalq təşkilatlar çərçivəsində Azərbaycan-Kanada tərəfdaşlığı, habelə qarşılıqlı maraq doğuran digər məsələlər diqqət mərkəzində olmuşdur. Tərəflər iki ölkə arasında əməkdaşlığın fəallaşdırılması üçün qarşılıqlı səfərlərin və məsələhətləşmələrin zəruriliyini vurğulamışdır. Araz Əzimov martın 27-də Ottavanın Karlton Universitetində çıxış etmişdir. Onun daha bir çıxışı martın 28-də Montrealdakı nüfuzlu Kvebek Universitetində gözlənilir. Hər iki məruzə “Xəzər regionunda təhlükəsizlik” mövzusundadır.
Səfir Fəxrəddin Qurbanov demişdir ki, bu, Azərbaycanın yüksək səviyyəli nümayəndə heyətinin Kanadaya ilk səfəridir. Görüşlərdə Kanada tərəfinin Azərbaycana böyük marağı hiss edilirdi. Biz qarşılıqlı maraq dairələrini müəyyənləşdirdik.
Bölmənin digər xəbərləri
