XILLI “NƏRƏ” BALIQARTIRMA ZAVODUNUN AÇILIŞ MƏRASİMİ
EKOLOGİYA VƏ TƏBİİ SƏRVƏTLƏR NAZİRİ HÜSEYNQULU BAĞIROVUN ÇIXIŞI
Xanımlar və cənablar!
Hörmətli tədbir iştirakçıları!
Bu gün Azərbaycanın təkcə balıqçılıq sahəsində yox, ümumiyyətlə, respublikanın inkişafında həddən artıq əlamətdar bir hadisə baş verir. Bu, təkcə hər bir ölkənin arzu etdiyi iqtisadi inkişaf, yeni iş yerlərinin açılması deyil, keyfiyyətcə tamamilə, yeni bir mərhələ deməkdir. Müdrik Prezidentimizin bizim hamımızı apardığı yolda ölkəmiz inkişaf etmiş sivil dövlətlərin həyatına aid olan bir hadisəni yaşayır. Gələcəyə yönəlmiş, Xəzərimizin sabahını nəzərdə tutan bir müəssisə işə salınır.
Təsəvvür edin, Xəzər dənizinin sahillərində ən böyük və ən müasir “Nərə” balıqartırma zavodu açılır. Heç bir Xəzəryanı ölkədə analoqu olmayan, XXI əsrin texnologiyalarına söykənən müəssisəni təhvil alırıq. Azərbaycanı Xəzərdə lider ölkə səviyyəsinə qaldıran, Xəzərdə təkcə neftlə yox, bioloji zənginliklə varlı olan ölkə statusumuzu təsdiq edirik. Zavodun işə düşməsi nərəkimilərin bərpası işində Azərbaycanı Rusiyadan sonra ikinci ölkəyə çevirir.
Bu zavodun inşasında Azərbaycan Respublikası Prezidentinin 1998-ci il 28 sentyabr tarixli Sərəncamına əsasən, Azərbaycan Respublikası ilə Beynəlxalq İnkişaf Assosiasiyası arasında imzalanmış “İnkişaf üçün kredit haqqında saziş”ə uyğun olaraq, təxirəsalınmaz ekoloji investisiyalar layihələri proqramının həyata keçirilməsi çərçivəsində başlanmışdır. “Nərə” balıqartırma zavodunun tikintisi layihəsinin həyata keçirilməsinə 8 milyon ABŞ dolları ayrılmışdır. Bunun 5,5 milyon dolları Dünya Bankından alınan güzəştli kredit, qalanı isə Azərbaycan hökumətinin bilavasitə qoyduğu vəsaitdir. Ekoloji tədbirlərin həyata keçirilməsinə Azərbaycan hökuməti tərəfindən bu həcmdə vəsaitin yönəldilməsi möhtərəm Prezidentimiz cənab Heydər Əliyevin ətraf mühitin mühafizəsinə, o cümlədən Xəzər dənizinin balıq ehtiyatlarının qorunub saxlanmasına və artırılmasına göstərilən diqqətini nümayiş etdirir. Bu gün burada belə bir nəhəng zavodun açılması bunun əyani sübutudur.
Çox hörmətli cənab Baş nazir, hörmətli Prezidentimizin və şəxsən Sizin Xəzər dənizinin ekologiyası, onun bioloji ehtiyatları, o cümlədən kökü kəsilməkdə olan nərə cinsli balıqların populyasiyasının vəziyyəti ilə bağlı narahatçılığınız Xıllı “Nərə” balıqartırma zavodunun tikintisi layihəsinin belə bir qısa müddət ərzində həyata keçirilməsinə təkan vermişdir.
Budur, indi cənab Prezidentin və hörmətli cənab Baş nazir, Sizin, habelə bütün ekoloqlarımızın arzusu reallığa çevrilmişdir. Xıllı “Nərə” balıqartırma zavodu ildə 4 növdə nərəkimilərin (bölgə, nərə, kaluqa və uzunburun) 15 milyon körpəsi yetişdiriləcəkdir.
Yeri gəlmişkən, demək istərdim ki, Xıllı “Nərə” balıqartırma zavodu ən qabaqcıl texnologiyalara cavab verməklə bərabər, Azərbaycanda ixtiologiya elminin inkişafına kömək edəcək, təhsilli kadrların formalaşması prosesini də sürətləndirəcəkdir.
“Nərə balıqartırma zavodunun inşasına 2002-ci ilin avqustunda, “Azərenerjitikintiquraşdırma” Səhmdar Cəmiyyəti ilə Almaniyanın “Ferrostaal” şirkəti arasında bağlanmış müqavilə əsasında başlanmışdır. Tikinti-quraşdırma işləri 2003-cü ilin iyul ayında demək olar ki, başa çatmış və hazırda tamamlama işləri də yekunlaşmışdır.
Tikinti üzrə məsləhətçi xidmətləri isə Fransanın “Sofreko” şirkəti həyata keçirmişdir. Bu əməkdaşlığın nəticəsində zavodda nərə balıqlarından kürü götürüldükdən sonra onlar öldürülməyəcək, Qeysər kəsiyi əməliyyatından sonra ana balıq sürüsünün formalaşdırılmasında istifadə olunacaqlar. Bu cəhətdən də həm zavod, həm də bütövlükdə ölkəmiz dünyanın ən yüksək ekoloji standartları səviyyəsində dayanacaqdır.
“Nərə” balıqartırma zavodunun istifadəyə verilməsi ekoloji problemlərin həlli istiqamətində addım olmaqla yanaşı, eyni zamanda, Neftçala rayonunun əhalisi üçün yeni iş yerlərinin açılması deməkdir. Zavodun açılması ilə 100-dən artıq rayon sakininin işlə təmin olunması üçün şərait yaradılmış və bu da dövlətimizin başçısının xalq haqqında daim düşündüyünə daha bir sübutdur.
İcazə verin, “Nərə” balıqartırma zavodunun istismara verilməsi münasibətilə Neftçala rayonunun rəhbərliyini, ziyalılarını və bütün sakinlərini Ekologiya və Təbii Sərvətlər Nazirliyinin kollektivi adından səmimi qəlbdən təbrik edim, Xıllı “Nərə” balıqartırma zavodunun yüksək səviyyədə işlədilməsi yolunda müvəffəqiyyətlər arzu edim.
Bölmənin digər xəbərləri
