XİN rəsmisi: Çexiya Avropada Azərbaycanın 3-cü ən böyük ticarət tərəfdaşıdır
Bakı, 25 sentyabr, AZƏRTAC
“Ölkələrimiz arasında qarşılıqlı dostluq və əməkdaşlığa əsaslanan münasibətlər mövcuddur. Çexiya Avropada Azərbaycanın 3-cü ən böyük ticarət tərəfdaşıdır”.
AZƏRTAC xəbər verir ki, bu fikirləri Xarici İşlər Nazirliyinin Avropa İdarəsinin rəisi Məmməd Əhmədzadə Çexiya Respublikasının Dövlətçilik Günü münasibətilə Bakıda keçirilən rəsmi qəbulda səsləndirib.
Dost çex xalqını bayram münasibətilə təbrik edən XİN rəsmisi bildirib ki, xüsusilə, enerji, təhsil, mədəniyyət sahəsində daha sıx əməkdaşlıq əlaqələri mövcuddur. Bildirib ki, ticarət dövriyyəmiz də xeyli artıb. Ölkələrimiz arasında münasibətlərin səmərəli əməkdaşlığa əsaslandığını vurğulayan M.Əhmədzadə son dövrlərdə qarşılıqlı səfər və təmasların artdığını deyib.
“Əminik ki, birgə səylərimizlə ölkələrimiz arasında əlaqələr daha da inkişaf edərək dərinləşəcək”, - deyə XİN rəsmisi vurğulayıb.
Bölmənin digər xəbərləri
