Xocalı faciəsinin dünya miqyasında öz hüquqi-siyasi qiymətini almaması təəssüf doğurur
Bakı, 26 fevral, AZƏRTAC
Avstraliyanın Pert şəhərində fəaliyyət göstərən Qərbi Avstraliya-Azərbaycan Dostluq Cəmiyyətinin rəhbəri Con Hammondun təşkilatçılığı ilə Xocalı soyqırımı ilə əlaqədar tədbir keçirilib.
Milli Məclisin mətbuat xidmətindən AZƏRTAC-a bildiriblər ki, tədbirdə Avstraliyanın və Azərbaycanın parlamentlərarası dostluq qruplarının, Avstraliya-Azərbaycan Dostluq Cəmiyyətinin üzvləri, mətbuat və ictimaiyyət nümayəndələri iştirak ediblər.
Avstraliya-Azərbaycan Dostluq Cəmiyyətinin rəhbəri Con Hammond ölkəmiz haqqında, o cümlədən Dağlıq Qarabağ münaqişəsi və Xocalı soyqırımı barədə məlumat verib. O, Xocalı həqiqətlərinin dünya ictimaiyyətinə çatdırılmasında Heydər Əliyev Fondunun vitse-prezidenti Leyla Əliyevanın təşəbbüsü ilə başlamış “Xocalıya ədalət!” kampaniyasının rolunu xüsusi qeyd edib.
Sonra Heydər Əliyev Fondu tərəfindən Xocalı soyqırımı haqqında hazırlanmış film nümayiş olunub. Filmdə erməni təcavüzü, Xocalı soyqırımını törədən indiki Ermənistan rəhbərliyinin insanlığa qarşı cinayəti haqqında məlumatlar yer alıb.
Tədbirdə çıxış edən Avstraliya-Azərbaycan dostluq qrupunun rəhbəri Luke Simpkins Xocalı faciəsinin dünya miqyasında öz hüquqi və siyasi qiymətini almadığını təəssüf hissi ilə söyləyib.
L.Simpkins və onun kimi düşünənlər Azərbaycanın ədalətli mövqeyinə hörmət etdiyinə və beynəlxalq hüququ dəstəklədiyinə, işğal altındakı torpaqlarımızın azad olunmasını, qaçqın və məcburi köçkünlərin öz yurdlarına qayıtmalarını tələb etdiklərinə görə dəfələrlə Avstraliya erməni icmasının təzyiqlərinə məruz qalırlar.
Dostluq qrupunun Avstraliyanın xarici işlər naziri Culiya Bişopun bu yaxınlarda parlamentdəki çıxışını xatırladıb və Azərbaycanın ərazi bütövlüyünün tanınması ilə bağlı Avstraliyanın mövqeyinin dəyişməz olaraq qaldığını söyləyib.
L.Simpkins Azərbaycana səfəri zamanı qaçqın və məcburi köçkünlərlə görüşüb şəxsən onların vəziyyətləri ilə tanış olduğunu, Azərbaycanın dünyanın yüksək mədəniyyət və dini tolerantlıq nümunəsi göstərən ölkələrindən biri olduğunu bildirib.
Tədbirdə Milli Məclisin Avstraliya ilə parlamentlərarası dostluq qrupun rəhbəri Xanlar Fətiyev çıxış edərək Xocalı faciəsinin ağır nəticələri barədə danışıb. O, Azərbaycan xalqının bu cinayətin qurbanları üçün ədalət tələb etdiyini, günahkarların beynəlxalq hüququn tələbi ilə cəzalandırılmasını istədiyini vurğulayıb.
Bildirilib ki, beynəlxalq ictimaiyyətin Ermənistan-Azərbaycan və bu kimi digər münaqişələrə ikili standartlarla yanaşması başqa ölkələrdə də gərginliyin artmasına səbəb olur.
Vurğulanıb ki, Xocalı faciəsi bir sıra beynəlxalq təşkilatlar tərəfindən tanınıb. Hazırda ABŞ-ın 21 ştatının, Pakistan, Meksika, Panama, İrlandiya, Rumıniya, Çexiya, Kolumbiya, Qvatemala, Bosniya və Herseqovina kimi ölkələrin parlamentləri Xocalı faciəsini soyqırımı və Azərbaycana qarşı cinayət aktı kimi tanıyıb: “Biz bu istiqamətdə işimizi davam etdirəcəyik və tezliklə dünyanın bir çox ölkələri bu soyqırımını tanıyacaq və inanırıq ki, Dağlıq Qarabağ münaqişəsi tezliklə öz ədalətli həllini tapacaq. Azərbaycanın ərazi bütövlüyü bərpa ediləcək, qaçqınlar və məcburi köçkünlər öz doğma torpaqlarına, evlərinə qayıdacaqlar”.
Bölmənin digər xəbərləri
