Xocalı soyqırımının beynəlxalq ictimaiyyətə çatdırılması istiqamətində mühüm işlər görülür
Bakı, 25 fevral (AZƏRTAC, Gözəl Ağayeva). Fevralın 25-də Azərbaycan Milli Elmlər Akademiyasının (AMEA) Nizami Gəncəvi adına Milli Azərbaycan Ədəbiyyatı Muzeyində Xocalı soyqırımının 22-ci ildönümü ilə əlaqədar tədbir keçirilmişdir.
AZƏRTAC xəbər verir ki, muzeyin direktoru, Milli Məclisin deputatı, AMEA-nın müxbir üzvü, professor Rafael Hüseynov 1992-ci il fevralın 25-dən 26-na keçən gecə erməni silahlı birləşmələrinin xalqımıza qarşı törətdikləri soyqırımı aktından geniş söhbət açmışdır. Bildirmişdir ki, bu hadisə son 200 ildə Azərbaycan xalqına qarşı aparılan soyqırımı siyasətinin ən qəddar mərhələsi olmuşdur. Təkcə ildönümü günündə və ya ərəfəsində soyqırımını xatırlatmaqla kifayətlənmək olmaz. Bu istiqamətdə işlər davamlı görülməli, məsələyə tarixi kontekstdən və sistemli şəkildə yanaşılmalıdır.
Faciənin baş verdiyi dövrdə- 1992-ci ildə “Amerikanın səsi” radiosunun Azərbaycandakı müxbiri olduğunu deyən Rafael Hüseynov soyqırımından sonra radionun baş redaktorunu azğınlaşmış erməni cəlladlarının təqibindən birtəhər canını qurtarıb Bakıdakı Respublika Klinik Xəstəxanasında müalicə olunan Xocalı sakinlərinin yanına apardığını diqqətə çatdırmışdır. Bildirmişdir ki, danışmağa halı olmayan bu insanlar suallarımıza cavab vermək əvəzinə yalnız ürkək nəzərlərlə bizə baxırdılar.
Qeyd olunmuşdur ki, 2001-ci ildə Azərbaycan Avropa Şurasına qəbul edildikdən az sonra-həmin il aprelin 26-da Avropa Şurası Parlamenti Assambleyasında Ermənistanın azərbaycanlılara qarşı törətdiyi soyqırımı siyasətinin tanıdılmasına dair ilk sənəd hazırlanmışdır. O vaxt nümayəndə heyətimizə rəhbərlik edən Azərbaycanın bugünkü Prezidenti İlham Əliyevin qətiyyəti sayəsində sənəd gerçəkləşmiş və imzalar toplanmışdır. Ümumilikdə 200-dən artıq sözün yer almasına icazə verilməyən bu sənəddə son 200 ildə ermənilərin xalqımıza qarşı həyata keçirdikləri soyqırımı siyasəti, eləcə də Xocalı faciəsi öz əksini tapmışdır.
Muzeyin direktoru bildirmişdir ki, son illərdə Xocalı soyqırımının beynəlxalq ictimaiyyətə çatdırılması istiqamətində mühüm işlər görülməkdədir. Bu baxımdan Heydər Əliyev Fondunun vitse-prezidenti Leyla Əliyevanın 2008-ci il mayın 8-də irəli sürdüyü “Xocalıya ədalət!” Beynəlxalq təbliğat və məlumatlandırma kampaniyası təqdirəlayiqdir. Həmçinin bu istiqamətdə Azərbaycan diasporunun fəal nümayəndələri də ardıcıl işlər aparırlar. Təqdirəlayiq haldır ki, artıq bir sıra ölkələrdə Xocalı hadisələri soyqırımı aktı kimi tanınmışdır.
Qeyd olunmuşdur ki, yazıçı-publisist, Əməkdar Jurnalist Vasif Səmədov və tanınmış alim Rövşən Vəlizadənin bu yaxınlarda çapdan çıxmış “Leyla Əliyeva: “Xocalıya ədalət!” (Beynəlxalq erməni terroruna qarşı yeni strateji model)” ikicildliyi müəlliflərin gərgin araşdırmaları, yorulmadan apardıqları tədqiqatlar nəticəsində ərsəyə gələn dəyərli mənbədir.
Fevralın 24-də Azərbaycan Respublikası Hərbi Prokurorluğunun inzibati binasında Memorial Soyqırımı Muzeyinin açıldığını diqqətə çatdıran Rafael Hüseynov yaxın günlərdə Azərbaycan, rus, ingilis dillərində muzeyin ekspozisiyası ilə bağlı kitab-albomun buraxılacağını və onun martın 31-də muzeyi ziyarət edənlərə təqdim ediləcəyini diqqətə çatdırmışdır.
Milli Azərbaycan Ədəbiyyatı Muzeyinin direktoru demişdir ki, Xocalı soyqırımı ən yaxın və ən dəhşətli tarixdir. Bu, təkcə azərbaycanlılara deyil, insanlığa qarşı törədilmiş cinayətdir. Soyqırımında həlak olan hər kəsin xatirəsi əzizdir, onların ruhları nigarandır. Yalnız Azərbaycan torpaqlarının işğaldan azad edilməsi bu ruhlara rahatlıq gətirər, taleyi pozulmuş insanlara təsəlli olar. O gün isə uzaqda deyildir. Həyatdan gedən günahsız insanlara Allahdan rəhmət diləyirəm.
Rafael Hüseynov xüsusi vurğulamışdır ki, Xocalı soyqırımının dünya ictimaiyyətinə çatdırılması istiqamətində işləri davam etdirmək bizim hər birimizin borcudur.
Bölmənin digər xəbərləri
