Yaponiyada koronavirusa yoluxanların sayı 25 minə çatıb
Tokio, 18 iyul, AZƏRTAC
Yaponiyada son sutka ərzində koronavirusa yoluxanların sayı daha 595 nəfər artaraq, 25 minə çatıb.
AZƏRTAC xəbər verir ki, bu barədə NHK telekanalı Yaponiya Səhiyyə, Əmək və Sosial Təminat Nazirliyinə və yerli administrasiyalara istinadla məlumat yayıb.
Bildirilir ki, virusa yoluxanların yarıdan çoxu - 293 nəfər Tokioda qeydə alınıb. Son iki gündə Yaponiya paytaxtında koronavirusa yoluxanların sayı rekord səviyyəyə çatıb. Belə ki, iyulun 16-da 286 nəfər koronavirusa yoluxan qeydə alınıb.
Ölkənin Kanaqava (43 yoluxma), Saytama (51 yoluxma), Osaka (53 yoluxma), Çiba (20 yoluxma), Hyoqo (25 yoluxma) və digər prefekturalarında da artım olduğu bildirilir.
Ümumiyyətlə, Yaponiyada 24 min 964 nəfərin koronavirusa yoluxduğu qeyd edilir. Bununla yanaşı, Okinavadakı ABŞ hərbi bazasında 141 koronavirusa yoluxma halının qeydə alındığı bildirilir. Yaponiya hökuməti ABŞ tərəfinə müraciət edərək bazadakı bütün hərbçilərin testdən keçirilməsini xahiş edib.
Qeyd edək ki, bu günədək Yaponiyada koronavirus pandemiyasına yoluxan 19 min 755 nəfər sağalıb, 998 nəfər isə həyatını itirib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
