YASAMAL RAYON TƏHSİL İŞÇİLƏRİNİN KONFRANSI KEÇİRİLMİŞDİR
Əvvəlcə konfrans iştirakçıları Fəxri xiyabana gedərək Azərbaycan xalqının ümummilli lideri Heydər Əliyevin əziz xatirəsini ehtiramla yad etmişlər.
AZƏRTAC-ın müxbiri xəbər verir ki, konfransda rayon təhsil şöbəsinin müdiri Vaqif Əmiraslanov 2003/2004-cü dərs ilində görülən işlərdən və qarşıda duran vəzifələrdən danışmışdır. O qeyd etmişdir ki, yeni dərs ili ərəfəsində rayonun bütün ümumtəhsil məktəblərində təmir işləri görülmüş, təhsil ocaqlarının maddi-texniki bazası möhkəmləndirilmişdir. Rayonun orta ümumtəhsil məktəblərini bitirmiş 2.447 məzundan 1.318 nəfəri ali məktəblərə qəbul olunmuşdur. Onlardan 64 nəfəri 600–dən yuxarı bal toplamışdır.
Təhsil nazirinin müavini İradə Hüseynova çıxış edərək Prezident İlham Əliyevin “Azərbaycan Respublikasında “Bilik günü”nün təsis edilməsi və təhsil müəssisələrində iş rejiminin tənzimlənməsi haqqında“ Fərmanının və “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007-ci illər) təsdiq edilməsi haqqında” Sərəncamının əhəmiyyətini vurğulamış, dövlət başçısının Azərbaycan təhsilinə göstərdiyi diqqət və qayğıdan, ölkəmizdə həyata keçirilən təhsil islahatlarının uğurlu nəticələrindən danışmış, yeni dərs ilində müəllimlərə müvəffəqiyyətlər arzulamışdır.
Təhsildə fərqlənmiş müəllimlərə fəxri fərmanlar və pul mükafatları təqdim olunmuşdur.
Konfrans iştirakçıları adından Prezident İlham Əliyevə müraciət qəbul olunmuşdur.
