YAŞAYIŞ MASSİVİNDƏ EPİDEMİOLOJİ VƏZİYYƏT NARAHATLIQ DOĞURMUR
Sumqayıtın yaxınlığında, Hacı Zeynalabdin Tağıyev adına qəsəbə ətrafındakı ərazidə əvvəllər yerli aviazavodun fəhlələri yaşayırdılar. Sovet İttifaqı dağıldıqdan sonra buradakı 9 uçuq-sökük binada Füzuli rayonundan olan məcburi köçkünlərin 300-ə yaxın ailəsi yaşayırdı. Həmin vaxtdan bu sahə müxtəlif yoluxucu xəstəliklər mənbəyinə çevrilmişdi.
S.Hüseynovanın sözlərinə görə, bu yaşayış massivinin ərazisində 86 kollektor vardı. Bir tərəfdən, elektrik enerjisi verilməsinin tez-tez kəsilməsi, nasos stansiyasının fasilələrlə işləməsi, digər tərəfdən, sakinlərin məişət qaydalarını müntəzəm pozması burada yoluxucu xəstəliklərin mənbəyi olan böyük bataqlıq yaranmasına gətirib çıxarmışdı. 1995-ci ildə burada malyariyaya kütləvi yoluxma halları qeydə alınmışdı.
Bu il Sumqayıt rəhbərliyinin təşəbbüsü ilə Qaçqınların və Məcburi Köçkünlərin İşləri üzrə Dövlət Komitəsinin, habelə “Azərsu” səhmdar cəmiyyətinin səyləri səfərbər olunmuş və yaşayış massivində əsaslı işlər görülmüşdür. Daxili kanalizasiya sistemləri tamamilə dəyişdirilmiş, bataqlıq qurudulmuş, nasos stansiyasında yeni transformatorlar quraşdırılmış, əhali arasında geniş profilaktik tədbirlər həyata keçirilmişdir.
