YAXIN İLLƏRDƏ AZƏRBAYCANDA KİKBOKSİNQ ÜZRƏ DÜNYA VƏ YA AVROPA ÇEMPİONATLARININ KEÇİRİLMƏSİ PLANLAŞDIRILIR
AZƏRTAC xəbər verir ki, bu sözləri Ümumdünya Kikboksinq Təşkilatları Assosiyasiyasının (WAKO) prezidenti Enio Falsone martın 29-da Beynəlxalq Mətbuat Mərkəzində keçirilən mətbuat konfransında səsləndirmişdir.
Azərbaycanda idmanın inkişafına göstərilən diqqət və qayğıdan söz açan natiq bildirmişdir ki, burada yaxşı və bacarıqlı kikboksinqçilər yetişməkdədir.
Bakı İdman Sarayında martın 30-da baş tutacaq kikboksinq üzrə peşəkarlar arasında birinci Azərbaycan çempionatı, WAKO-PRO versiyası üzrə interkontinental kəməri və Avropa çempionatı kəməri uğrunda beynəlxalq turniri yaxından izləyəcəyini bildirən E.Falsone Azərbaycan kikboksinq və muey-tay federasiyasının fəalliyətindən razı qaldığını bildirmişdir.
Tədbirdə çıxış edən Azərbaycan kikboksinq və muey-tay Federasiyasının prezidenti, Milli Məclisin deputatı Adil Əliyev demişdir ki, sabah baş tutacaq peşəkarlar arasında I Azərbaycan çempionatında idmançılar 5 çəki dərəcəsi üzrə mübarizə aparacaqlar. Yarışların qalibi olacaq idmançılar peşəkarlar arasında keçiriləcək müxtəlif beynəlxalq turnirlərdə ölkəmizin idman şərəfini qoruyacaqlar.
Natiq bildirmişdir ki, turnirdə Rusiya Federasiyasından və İspaniyadan olan peşəkar döyüşçülər Aleksandr Vikulov və Oskar Ruyeda (hər ikisi 62 kq) döyüşəcəklər. Azərbaycanı peşəkar döyüşçülər, Avropa və dünya çempionları Eduard Məmmədov, Hafiz Baxşəliyev və digərləri təmsil edəcəklər. Həmçinin 88 kiloqram çəki dərəcəsində də iki beynəlxalq döyüş keçiriləcəkdir.
Bölmənin digər xəbərləri
