Berlin, 7 yanvar, AZƏRTAC

Yeni il gecəsi Berlində iğtişaşlar törədən şəxslərin müəyyənləşdirilməsi və onların əməllərinə hüquqi qiymət verilməsi istiqamətində araşdırmalar davam etdirilir.

AZƏRTAC xəbər verir ki, son açıqlanan rəqəmlərə görə, Yeni il gecəsi ümumilikdə 1453 cinayət əməli törədilib və hadisələrin iştirakçısı olmaqda şübhəli bilinən 670 nəfər müəyyən edilib. Həmin şəxslərin 264-nün Almaniya vətəndaşlığı yoxdur. Almaniya vətəndaşlığı olan digər 406 nəfərin neçəsinin əslən hansı ölkələrdən olduğu açıqlanmayıb. Şübhəli bilinən əcnəbilər arasında türk, suriyalı və əfqanlarla yanaşı, müxtəlif ölkələrdən olan şəxslər də var.

Ümumilikdə Yeni il gecəsi 241 xəsarət faktı qeydə alınıb. Pirotexniki vasitələrdən istifadə nəticəsində 363 nəfər xəsarət alıb. Polis əməkdaşlarına və səhiyyə işçilərinə ümumilikdə 58 hücum olub. Polis əməkdaşlarına hücumda şübhəli bilinənlərdən 40-nın şəxsiyyəti müəyyənləşdirilib. Yeni il gecəsi atəşfəşanlıq və pirotexniki vasitələrdən istifadə nəticəsində 5 nəfər həlak olub.

Ölkənin siyasi dairələrində və ictimaiyyət arasında geniş narazılığa və hiddətə səbəb olan bu hadisə ilə bağlı fəal müzakirələr aparılır, atəşfəşanlığın qadağan edilməsi tələbi irəli sürülür. Müxtəlif partiyalardan olan siyasətçilər ictimai asayişin pozulmasına, eləcə də polis əməkdaşlarına, yanğınsöndürənlərə və tibb işçilərinə hücumlara görə cəzaların sərtləşdirilməsinin zəruriliyini bildirirlər. Daxili işlər naziri Nensi Fezer bir neçə gün əvvəl açıqlamasında belə hücumlara görə beş il müddətinə azadlıqdan məhrumetmə cəzasının tətbiq edilməsinin vacibliyini vurğulamışdı. Həmçinin iki milyon nəfərdən çox insanın imzaladığı, pirotexniki vasitələrin istifadəsinin, atəşfəşanlığın qadağan edilməsini nəzərdə tutan petisiya ölkənin Daxili İşlər Nazirliyinə təhvil verilib.

İğtişaşlarla bağlı polis araşdırmaları davam etdirilir.

Elvin Mövsüm

AZƏRTAC-ın xüsusi müxbiri

Berlin