YENİYETMƏLƏR ARASINDA RESPUBLİKA ŞAHMAT OLİMPİADASI BAŞA ÇATMIŞDIR
Azərbaycan Şahmat Federasiyasından (AŞF) AZƏRTAC-a bildirmişlər ki, Zaqatala Olimpiya-İdman Kompleksində 16 yaşa qədər yeniyetmələr arasında Respublika şahmat olimpiadası başa çatmışdır. On gün davam edən yarışlarda 38 şəhər və rayonu təmsil edən 306 yeniyetmə oğlan və qız qələbə uğrunda mübarizə aparmışdır. Şəxsi və komanda yarışları İsveçrə sistemi üzrə keçirilmişdir.
Olimpiadada 8 yaşlıların mübarizəsində Vüsal Həsrətli, Xanım Balacayeva, 10 yaşlılar arasında Elxan Bayramov, Lalə Firudinli, 12 yaşlıların yarışında Aqil Pirverdiyev, Səbinə İbrahimova, 14 yaşlıların qarşılaşmasında Anar Ələkbərov, Nərmin Kazımova, 16 yaşa qədər şahmatçıların mübarizəsində isə Elşad Abdullayev və Gülnar Məmmədova birinci olmuşlar.
Komanda yarışlarında 1 nömrəli Bakı Şahmat Məktəbi qalib adını qazanmış, həmin məktəbin şagirdi E.Abdullayev isə şəxsi turnirdə birinci olmuşdur.
Respublika olimpiadasında diqqəti cəlb edən maraqlı məqam ən kiçik iştirakçı - 4 yaşlı biləsuvarlı Elmir Məmmədovun 8 yaşlı şahmatçılarla bir sırada mübarizə aparmasıdır.
Olimpiadada ilk üç yeri tutmuş yeniyetmə şahmatçılara AŞF-nin və Zaqatala Rayon İcra Hakimiyyətinin kubok, pul mükafatı və müxtəlif hədiyyələri təqdim edilmişdir.
Bölmənin digər xəbərləri
