REGİONLAR
Yerli məhsulların keyfiyyət standartlarına uyğunluğu yoxlanılır
Naxçıvan, 17 sentyabr, AZƏRTAC
Naxçıvan Muxtar Respublikası Antiinhisar və İstehlak Bazarına Nəzarət Dövlət Xidməti tərəfindən yerli məhsulların daxili və xarici bazarlarda rəqabətədavamlı olması üçün keyfiyyət standartlarına əməl edilməsinə nəzarət işi, o cümlədən təsərrüfat subyektlərinin istehsal-xidmət şəraitinin və məhsul göstəricilərinin texniki normativ-hüquqi aktların, standartların və texniki şərtlərin tələblərinə uyğunluğunun diqqətdə saxlanılması avqust ayı ərzində də davam etdirilib.
Xidmətdən AZƏRTAC-ın Naxçıvan bürosuna bildirilib ki, ümumilikdə, məhsul nümunələrinin 219 halda, o cümlədən qida məhsullarının 193 halda keyfiyyət və təhlükəsizlik göstəricilərinin yoxlanılması təmin olunub və bu istiqamətdə nöqsan aşkar edilməyib.
Yerli istehsal məhsullarının keyfiyyətinin qorunması məqsədilə 93 qida istehsalı müəssisəsinə maarifləndirmə xarakterli baxış keçirilib, aşkar olunmuş çatışmazlıqların aradan qaldırılması istiqamətində müvafiq işlər görülüb.
Meyvə-tərəvəz və onlardan hazırlanmış məhsulların keyfiyyətinin nəzarətdə saxlanılması məqsədilə sertifikatlaşdırma prosedurları və monitorinqlər üzrə avqust ayı ərzində, ümumilikdə, məhsulların 33 halda texniki normativ-hüquqi aktların, standartların və texniki şərtlərin tələblərinə uyğunluğu yoxlanılıb və nöqsan aşkar olunmayıb.
Arıçılığın inkişafı üzrə müvafiq Dövlət proqramının icrası istiqamətində bal məhsullarının 115 halda laboratoriya analizləri aparılıb, sınaqların nəticələrinin texniki normativ-hüquqi aktların, standartların və texniki şərtlərin tələblərinə uyğun olduğu müəyyən edilib. Həmçinin avqust ayı ərzində, ümumilikdə, 7 ailə təsərrüfatına istehsal etdikləri məhsulların etiketlərinin hazırlanmasında müvafiq köməklik göstərilib. Ailə təsərrüfatı məhsullarının keyfiyyəti diqqətdə saxlanılıb, məhsullardan 115 halda nümunələr götürülərək laboratoriyaya təqdim olunub, sınaqların nəticələrinin texniki normativ-hüquqi aktların, standartların və texniki şərtlərin tələblərinə uyğun olduğu müəyyən edilib.
Hesabat ayı ərzində alkoqollu içkilər istehsal edən 3 müəssisədə istehsal olunan arağın 2 halda, pivənin 1 halda laboratoriya analizləri aparılaraq standartlara uyğunluğu müəyyən edilib. 138 bərbərxana və 54 gözəllik salonuna, 36 ət satışı mağazasına, 102 ictimai iaşə və xidmət sahəsinə, 323 ərzaq və qeyri-ərzaq mağazasına maarifləndirmə xarakterli baxış keçirilib, aşkar olunmuş çatışmazlıqların aradan qaldırılması təmin edilib. Fəaliyyətin standartlara uyğun qurulması məqsədilə, ümumilikdə, 36 təsərrüfat subyektində, o cümlədən 3 istehsal müəssisəsində, 1 ictimai iaşə və xidmət sahəsində, 8 ərzaq mağazasında, 23 bərbərxana və 1 gözəllik salonunda təmir işləri başa çatdırılıb. Metroloji norma və qaydalara uyğun olaraq 1868 ölçmə vasitəsi yoxlanılıb.
Muxtar respublikada istehsal olunan məhsulların markalanmasına nəzarət məqsədilə 8 istehsal müəssisəsində maarifləndirmə xarakterli monitorinqlər aparılıb, 3 müəssisədə istehsal olunan məhsulların etiketlərində orfoqrafik səhvlərin olduğu və standartların tələblərinin pozulduğu aşkarlanıb, çatışmazlıqların aradan qaldırılması üçün müvafiq təsərrüfat subyektləri məlumatlandırılıb.
Ticarət, ictimai iaşə, məişət və digər növ xidmət qaydalarına uyğun olaraq idxal olunmuş məhsulların üzərinə 1 halda Azərbaycan dilində zəruri məlumatların vurulması təmin edilib.
Ötən ay istehlak bazarının tələblərinə uyğun rəqabətqabiliyyətli məhsul istehsalının təmin edilməsi, ailə təsərrüfatları məhsullarının ixracına dəstək göstərilməsi üzrə verilmiş tapşırıqların icrası istiqamətində təsərrüfat subyektləri ilə 18 halda abonent müqaviləsi bağlanıb. İstehsal edilən məhsulların ixrac olunacaq ölkələrə uyğun markalanması, beynəlxalq idarəetmə standartlarının tətbiqi, zərurət yarandıqda ixrac məhsullarının partiyalarla sertifikatlaşdırılmasının təmin edilməsi kimi məsələlər müəssisə rəhbərlərinin diqqətinə çatdırılıb. Bakı və Gəncə şəhərlərində fəaliyyət göstərən “Naxçıvan məhsulları” mağazalar şəbəkəsinə tələbata uyğun olaraq davamlı qaydada məhsulların göndərilməsi təmin edilir. Müvafiq istiqamətdə satılan məhsulların aylar üzrə uçotu aparılmaqdadır.
Payız-qış mövsümünə hazırlıqla əlaqədar Fövqəladə Hallar Nazirliyi və Dövlət Gömrük Komitəsi ilə birgə avqust ayı üzrə, ümumilikdə, 471 ədəd qaz məişət cihazına baxış keçirilib və müvafiq təhlükəsizlik sistemi ilə təmin olunmayan 3 ədəd qaz məişət cihazının idxalına icazə verilməyib.
Ötən ay, ümumilikdə, texniki normativ-hüquqi aktların, standartların və texniki şərtlərin tələblərinə uyğun olmayan 506 manat dəyərində keyfiyyətsiz məhsullar satışdan çıxarılıb.